Hlăm klei bi kƀĭn, phung bi ala ksiêm dlăng kơ boh klei hlue ngă bruă duh mkra ala ƀuôn, lĭng kahan - klei êđăp ênang thŭn 2025 leh anăn bi trông, bi mklă hdră tă, klei kñăm, bruă klam thŭn 2026. Hlue si klei hưn mdah mơ̆ng Knơ̆ng bruă sang čư̆ êa čar, hlăm thŭn 2025, wăt tơdah tuôm lu hŏng klei dleh dlan, boh nik hmăi kơ angĭn êbŭ mrô 13 leh anăn dŭm gưl êa lip ngă luč liê êbeh 12 êbâo êklai prăk, bruă duh mkra ala ƀuôn čar Dak Lak ăt krơ̆ng klei hơĭt.

Čar mâo 12/16 hnơ̆ng kčah bruă duh mkra ala ƀuôn djăp leh anăn êbeh hdră kčah; prăk hrui wĭt kah knar grăp čô mnuih mâo êbeh 80 êklăk prăk; ênoh hrui wĭt knŭk kna mâo 16.500 êklai prăk, prăk hrui wĭt ba čhĭ kơ ala tač êngao mâo 2,8 êklai USD, đĭ 26% mkă hŏng wưng thŭn 2024. Dŭm bruă dhar kreh - ala ƀuôn lŏ dơ̆ng mđing uêñ,klei hdĭp mda ala ƀuôn dưi rơ̆ng, ênoh gŏ êsei ƀun hrŏ mơ̆ng 3% kơ dlông, hjăn gŏ êsei ƀun hlăm krĭng mnuih djuê ƀiă hrŏ êbeh 4%. Bruă lĭng kahan - răng mgang klei êđăp ênang dưi krơ̆ng kjăp.