Boh nĭt phung bi ala mâo bi êdah leh boh tŭ dưn klei đĭ kyar bruă duh mkra thŭn 2025  mơ̆ng čar Daklak djăp 6,68%, ƀiă hĭn hŏng ênoh čuăn. Êjai msĕ snăn, mta kñăm kơ klei đĭ kyar mơ̆ng 10% kơ dlông hlăm thŭn 2026 tui si hdră êlan mơ̆ng gưl dlông lehanăn hdră mtrŭn mơ̆ng klei bi kƀĭn prŏng Đảng čar, jing klei kpĭ prŏng snăk. Tui si  Trần Văn Tân, Khua knơ̆ng bruă ngăn prăk čar Daklak čiăng dưi bi sĭt ênoh čuăn anăn, čar mâo leh hdră êlan kjăp hlăm klei tuh tia, bruă rŭ mdơ̆ng lehanăn mnia mblei, mđing kơ bruă duh bi liê kluôm, lehanăn ngăn prăk êngao knŭk kna yơh jing boh phŭn.

 “Kơ alŭ wăl tuh tia, lehanăn bruă rŭ mdơ̆ng, lŏ dơ̆ng bi klă jing bruă phŭn mâo klei đĭ kyar 18,14%. Alŭ wăl duh bi liê kluôm mđing bi liê mtam ênŭm 100% prăk kăk kơ bruă kluôm djŏ tui si hdră kčah, tĭng hlăm brô êbeh 14.000 êklai prăk. Êngao anăn lŏ duah mơ̆ng dŭm anôk mkăn mâo gưl dlông mă bruă leh hŏng alŭ wăl. Bi prăk duh bi liê êngao kơ prăk knŭk kna, ăt mđing ruh mgiah bi jih mơh hdră êlan mă bruă, boh nik kơ klei duh bi liê čiăng kơ djăp mta bruă mâo ngă hŏng klei jăk.”