Hluê si klei hưn, čar Dak Lak ngă leh klei bi kƀĭn tal 1, tŭ ư hưn mdah 28 čô mgơ̆ng ruah bi ala Bruă Kbĭn ala gưi 16 ti alŭ wăl čiăng ruah mă 15 čô bi ala, hưn mdah 148 čô mgơ̆ng ruah Êpul gơ̆ng bruă ƀuôn sang čar čiăng ruah 84 čô bi ala, hưn mdah êbeh 4.300 čô čiăng ruah 2.445 čô bi ala Êpul gơ̆ng bruă ƀuôn sang gưl să. Leh klei kƀĭn, čar lŏ ngă ngă bruă mkŏ wĭt, hưn mdah ênoh mnuih mgơ̆ng ruah hluê si klei čuăn, rơ̆ng kơ knhuah bi ala, êngiê leh anăn klei dưi ruah mdưm mơ̆ng phung mplĕ hră.

Čiăng rơ̆ng kơ klei êđăp ênang bruă kđi čar yang ƀuôn, dŭm êpul bruă mkŏ mjing leh hdră êlan klă klơ̆ng, bi mguôp kjăp, bruă tŭ mă hră mơar mgơ̆ng ruah leh anăn dŭm bruă djŏ tuôm, mkŏ mjing êđăp ênang, djŏ hdră bhiăn. Êpul ksiêm dlăng čih yap, bi myuôm klei čŏng mprăp, bruă klam mơ̆ng dhar bruă ruah khua čar Dak Lak, mñă kơ čar lŏ dơ̆ng mđĭ hĭn bruă răng mgang klei kđi čar, bi kluôm dŭm hdră êlan răng mgang klei êđăp ênang ti dŭm anôk mplĕ hră, mtrŭt mđĭ bruă hâo hưn čiăng kơ phung mplĕ hră thâo klă kơ phung mgơ̆ng ruah, ngă klei dưi ruah mdưm mơ̆ng pô.