Tlam 28/12, ti să Ia Dom (čar Gia Lai), Binh đoàn 15 (Phŭn bruă lĭng kahan) mkŏ mjing Knăm mphŭn rŭ mdơ̆ng Sang dhar kreh să Ia Dom. Anei jing hdră mphŭn kčưm hlăm hdră mdơ̆ng 9 boh sang dhar kreh kơ mnuih ƀuôn sang dŭm să knông lăn nah Yŭ dua čar Gia Lai leh anăn Quảng Ngãi.

Hlue si hdră, 9 boh sang dhar kreh mâo bi liê mdơ̆ng hŏng ênoh bi liê 20 êklai prăk. Grăp boh sang mâo mdơ̆ng hlue si knhuah djuê ana, djŏ guôp hŏng knhuah dhar kreh mnuih ƀuôn sang dŭm djuê ana krĭng knông lăn Gia Lai leh anăn Quảng Ngãi. Mĭn tĭng, jih jang 9 boh sang srăng bi leh leh anăn ba yua hlăm mlan 9/2026. Blŭ hrăm hlăm knăm phŭn rŭ mdơ̆ng, Thượng tướng Trương Thiên Tô, Khua Dhar bruă kđi čar Êpul lĭng kahan yang ƀuôn Việt Nam brei thâo: Bruă bi liê rŭ mdơ̆ng sang dhar kreh ti dŭm să knông lăn Lăn Dap Kngư bi êdah klei mđing uêñ mơ̆ng Đảng, Knŭk kna leh anăn Êpul lĭng kahan hŏng mnuih ƀuôn sang djuê ƀiă, kñăm mđĭ êpul bi hgŭm jih jang mnuih ƀuôn sang, bi kjăp hlăm ai tiê mnuih ƀuôn sang, mguôp hŏng bruă klam krơ̆ng kjăp klei kđi čar, lĭng kahan - klei êđăp ênang ti alŭ wăl.