Hruê mbruê 19/8, Êpul kriê dlăng wăl anôk bruă duh mkra leh anăn tuh tia čar Khánh Hòa bi mguôp hŏng êpul ngă bruă mơ̆ng êpul grŭp ExxonMobil (Mi) ksiêm dlăng alŭ wăl Nam Vân Phong. Êpul ngă bruă ksiêm dlăng ti dŭm anôk mâo klei găl, anôk mâo anôk ala prŏng, êa ksĭ êlam, bruă mkŏ mkra găl guôp. Hluê si klei bi êdah, hdră mkăp mơ̆ng Exxon Mobil mâo ênoh duh bi liê kơ hdră mĭn tĭng 10 êklai dolar Mi, mâo dŭm mta, sang măi kar êa pui mrâo mrang, sang hjiê, kdrŭn ksĭ leh anăn anôk bruă hdră mnêč.

Anei srăng jing sang măi amâo mâo êwa čhŏ tal êlâo hlăm tar rŏng lăn mơ̆ng êpul grŭp, tơdah dưi ngă ti Việt Nam. Hluê si phung thơ̆ng kơ bruă, Nam Vân Phong, čar Khánh Hoà dưi bi klă jing anôk găl guôp  čiăng mđĭ kyar dŭm mta bruă mrâo mrang, kar êa pui hnơ̆ng prŏng kyua jing anôk hdră êlan plah wah dŭm êlan dŭ mdiăng êlan êa ksĭ, jing anôk ƀiă angĭn, boh êlam êa ksĭ hơĭt leh anăn mâo lăn găl kơ klei pŏk mlar hŏng grăp wưng. Alŭ wăl anei ăt mprăp leh dŭm êlan mkŏ hŏng êlan dơ̆ng, êlan êdeh treng, bi mâo djăp klei čiăng dŭ mdiăng lu êa pui.