Leh mnuih ƀuôn sang mŭt hlăm Anôk bruă ngă hră mơar knŭk kna ƀuôn hgŭm Hội Phú, čar Gia Lai, robot AI êmuh hrăm, êmuh klei čiăng leh anăn ktrâo lač ngă hră mơar knŭk kna. Anei jing klei blŭ Robot mtô kơ 2 čô mda asei nao ngă hră mơar bi dôk ung mô̆:

“Čiăng ngă hră mơar ung mô̆, brei ih mprăp hră čih anăn ung mô̆ hlue si hră bi hmô, hră kak asei mnuih ƀuôn sang dôk dưi yua čiăng bi mklă găp djuê, hră bi mklă anôk dôk mô̆, ung,  phung êkei brei djăp 20 thŭn, mniê mơ̆ng 18 thŭn”.

Hŏng klei thâo ksiêm dlăng leh anăn wĭt lač klei êmuh djŏ tuôm kơ hră mơar bi dôk ung mô̆, klei dưi yua lăn, rŭ mdơ̆ng, anôk dôk… Robot AI đru kơ mnuih ƀuôn sang klă kơ hră mơar, hdră hlue ngă ăt msĕ mơh anôk mă hră mơar hŏng klei pral, găl ênưih. Nguyễn Mạnh Thi  hriê ngă hră mơar bi mlih klei kñăm yua lăn brei thâo, klei lông ngă mrâo anei ngă kơ ñu bi kngăr snăk:

“ Klei ktrâo lač kơ pô jăk snăk, truh snăn êmuh hrăm, msĕ si klei čiăng nao ti anôk ngă ya hră mơar Robot srăng atăt pô truh ti anôk anăn. Phung khua thŭn snăn lu blư̆ amâo thâo gư̆ ôh mrô snăn čiăng pô nao ti anôk mă boh tŭ amâodah ti lăn ala rŭ mdơ̆ng snăn pô lač leh anăn robot srăng atăt pô nao ti anôk anăn.”

Hlue si Trần Công Danh, knuă druh Anôk bruă ngă hră mơar knŭk kna ƀuôn hgŭm Hội Phú, robot AI thâo mĭn mâo Knơ̆ng bruă sang čư̆ êa ƀuôn hgŭm bi liê leh anăn ba yua mơ̆ng mlan 8/2025. Čiăng ba yua tŭ dưn, robôt dưi bi mŭt ênŭm hră mơar, mrô djŏ tuôm kơ hră mơar knŭk kna, hră mơar, hdră hlue ngă leh anăn khăng mâo mtô bi hriăm čiăng mđĭ klei thâo bi blŭ hrăm hŏng mnuih ƀuôn sang.

Robot Ai anei mâo bi mŭt hră mơar, mrô djŏ tuôm kơ hră mơar knŭk kna đru kơ mnuih ƀuôn sang găl ênưih hlăm bruă ksiêm dlăng. Bruă tal êlâo jing hmei ba hră mơar knŭk kna, hră mơar čiăng êdi leh anăn klei ngă hră mơar, klei mă mrô, ktrâo lač kơ mnuih ƀuôn sang nao ti anôk mă bruă bruă čiăng hră mơar snăn pô dưm klei hâo hưn, hră mơar djŏ tuôm čiăng kơ robot mă leh anăn thâo săng, ăt msĕ mơh khăng mtô nanao čiăng kơ robot mưng bruă ngă.”

Hlue si klei ksiêm yap, kah knar grăp hruê Robot AI ti ƀuôn hgŭm Hội Phú đru, kčĕ kơ êbeh 100 gưl mnuih ƀuôn sang nao msir mgaih hră mơar knŭk kna.

 Kyua klei đru mơ̆ng robot AI, ênoh msir mgaih hră mơar leh anăn tla boh tŭ djŏ mmông kčah ti Anôk bruă ngă hră mơar knŭk kna ƀuôn hgŭm Hội Phú lu mlan mâo êbeh 95%.  Hoàng Minh Nghĩa,  K’iăng Khua Knơ̆ng bruă sang čư̆ êa ƀuôn hgŭm Hội Phú, bi mklă bruă yua kdrăp mrô AI ba leh klei tŭ dưn klă hlăm klei mkra mđĭ hră mơar ti alŭ wăl, pŏk êlan yua mrâo mrang, jăk giăm hĭn hlăm klei duh kơ mnuih ƀuôn sang, anôk bruă duh mkra.

“Masin ktrâo atăt leh snăn hnơ̆ng djŏ klă lu, hră mơar dưi bi mklă hŏng ênoh mrô hŏng klei djŏ klă snăn mnuih ƀuôn sang sa ai. Phung thơ̆ng kơ bruă srăng mâo lu hruê mmông mđing hlăm klei thơ̆ng kơ bruă hĭn kơ mblang. Tơdah blang snăn srăng mâo lu hruê mmông mă bruă, ară anei mâo leh Robot đru snăn phung thơ̆ng kơ bruă mđing kơ bruă knuă snăn hnơ̆ng bruă dưi msir mgaih lu hĭn, msir pral hĭn leh anăn dưi ƀiă klei kpăk đuôm”./.