Dŭm hrue mdei msăn, Phạm Xuân Hương mbĭt hŏng dŭm gŏ sang mnuih ƀuôn sang ti ƀuôn O Sơr, să Ia Kênh, ƀuôn prŏng Pleiku hiu suang dlăng jêñ jêñ hlăm dliê phăn jao kơ pô hlăm dliê răng mgang akŏ êa nueng. Ñu brei thâo:

 “Ngă bruă čuăn snăn dŭm gŏ sang tŭ mă phăn jao mđĭ hĭn leh bruă klam. Êlâo hĭn hriam êmuh kơ klei thâo mă bruă kơ klei bhiăn răng mgang dliê, ngă jăk bruă răng kriê dliê hlăm grăp hrue. Boh nik mđing hâo hưn kơ mnuih ƀuôn sang, dŭm gŏ sang ngă hma jĕ hŏng dliê, mtă amâo mâo čuh dliê, amâo dưi koh druôm kyâo, amâo mâo ksĭng mmiă lăn dliê ôh”.

Êpul kiă kriê bruă răng mgang dliê nah dưr Êa Nueng hlăk dôk kiă kriê êbeh  9.000 ha dliê, găn hlăm dŭm kdriêk Chư Păh, Ia Grai, Đăk Đoa lehanăn ƀuôn prŏng Pleiku. Hlam krah yan bhang không mđiăng ktang, jih jang êpul êya ngă bruă răng mgang dliê, mâo tiŏ nao răng kriê kjăp dliê boh nik hlăm dŭm čuê dliê jing ênưih lĕ hlăm klei pui ƀơ̆ng. Nguyễn Tất Thành-Khua anôk bruă răng mgang dliê Dưr Êa nueng lač:

 “Kma mŭt hlăm yang không, êpul êya bruă ngă mtam klei hiu ktir êlan gang pui, čuh tir hĕ êlâo gang mkhư̆ êlan pui hlia, êpul êya bruă mâo leh klei bi kƀĭn, lehanăn tiŏ nao jih jang mnuih hlăm êpul bruă kiă kriê dliê, lŏ mkra 5 anôk kăp răng kơ dliê boh nik hlăm dliê pla, mâo mbĭt hŏng êpul knuă druh răng mgang dliê, lehanăn mbĭt hŏng mnuih ƀuôn sang bi mlih mbĭt gak răng čiăng hmao ƀuh bi pral kñăm dưi mghaih msir mtam huĭdah mâo klei amâo mâo, hlue hdră hlŏng ngă 4 mta bruă ti anăn mtam”.

 Hlăm kluôm čar Gia Lai mâo 286 krĭng phŭn ênưih lĕ hlăm klei pui ƀơ̆ng ti gưl 5, hŏng ênhă êbeh 124.000 ha, lu jing dliê hngô, dliê hrông, lehanăn dliê êdrah. Trương Văn Nam, Khua knơ̆ng bruă dliê kyâo čar Gia Lai lač.

 “Knơ̆ng bruă dliê kyâo, bi mguôp leh hŏng kahan ksiêm čar mkŏ mjing hdră mă bruă, mtrŭt mjhar ti 17 kdriêk, wăl krah, ƀuôn prŏng kơ bruă gang mkhư̆ klei pui ƀơ̆ng dliê. Dŭm êpul êya pô dliê čŏng ngă jih jang bruă răng mgang, msĕ si čuh tir êlan gang pui, waih bi mdoh klông gang pui čiăng bi hrŏ hnơ̆ng lui rai tơdah tuôm hŏng klei pui ƀơ̆ng dliê”./.