Alŭ wăl duh mkra Dhŭng Pleiku (ƀuôn hgŭm Bờ Ngoong, čar Gia Lai) mâo khua knŭk kna bi mklăh dră êlan duh bi liêmơ̆ng mlan 9/2019. Anôk bruă anei mâo boh prŏng giăm 200 ha, hŏng ênoh prăk bi liê jih jang 500 êklai prăk, mâo Êpul grŭp Cao su Việt Nam jing pô duh bi liê. Mta kñăm čiăng bi leh wưng tal êlâo hlăm thhŭn 2022 lehanăn bi bŏ hlăm alŭ wăl duh mkra knŏng hlăm wang 5 thŭn. Siămdah, truh kơ ară anei, ka dưi mă bruă mơh kyua gun kpăk hlăm bruă hră mơar, bi mlih klei čuăl mkă.

Ti anôk ksiêm wĭt mrâo anei, Khua bruă Đảng čar Gia Lai Hồ Quốc Dũng mtă kơ pô duh bi liê bi leh jih jang bruă mghaih msir êa djah, lehanăn dŭm mta bruă êngao hdră hlăm wang 4 mlan, lehanăn bi mguôp kjăp hŏng dŭm knơ̆ng dhar bruă čiăng mđĭ bi pral bruă knuă. Lê Trung Kiên, Khua knơ̆ng kiă kriê knơ̆ng bruă Cao su Chư Sê – êpul ngă bruă anei, lač;

 “Leh mâo klei gĭt gai mơ̆ng čar, knơ̆ng bruă mâo tŭ mă leh klei gĭktrâo atăt mơ̆ng êpul bruă kiă kriê klei duh mkra Gia Lai. Hmei srăng ngă jih jang bruă, bi mlih hdră êlan duh bi liê, čiăng bi djŏ guôp hŏng mta mtrŭn mơ̆ng hdră bhiăn, lehanăn lŏ dơ̆ng mâo dŭm hdră êlan ba mdah čiăng tŭ ư kơ klei duh bi liê, lehanăn pral dưi mă bruă”.

Ti ƀuôn hgŭm Pleiku, bruă rŭ mdơ̆ng ƀuôn prŏng doh CK54 dưi yap jing kliăng pioh mtrŭt klei mđĭ kyar alŭ wăl ƀuôn prŏng, lehanăn pŏk klei găl kơ bruă hiu čhưn ênguê. Anôk anăn mâo truh 240 ha, hŏng ênoh mnuih hlăm brô 17.000 čô mnuih, tă êlan kơ bruă rŭ mdơ̆ng ƀuôn prŏng mta mrâo, găp guôp hlăm bruă bi mnia mblei, bruă sang hră mơar, bruă mdrao mgŭn, lehanăn mjuăt asei mlei. Đặng Toàn Thắng, khua knơ̆ng bruă sang čư̆ êa ƀuôn hgŭm Pleiku, brei thâo, alŭ wăl hkăk hgŭm ghŏng dŭm êpul bruă djŏ tuôm bi leh jih jang bruă êlâo kơ hrue bi hdơr knăm mkŏ mjing lăn čar.

“Wăl ƀuôn prŏng doh CK54 dưi rŭ mdơ̆ng srăng jing anôk jăk kơ klei mđĭ  kyar bruă duh mkra ala ƀuôn hlăm alŭ wăl. Mâo lu mta bruă dưi rŭ mkra msĕ si tač golf 18 ƀăng, alŭ wăl mnia mblei, sang mnia prŏng mâo giăm 5 ha, war mnga anôk tač êa, sang jưh djăp ênoh čuăn 5 sao, Sang bi kƀĭn… Hŏng wăl jăk siam, adiê êđăp, jăk găl kơ anôk mdei msăn, bruă anei srăng iêo jak klei duh bi liê, bruă hiu čhưn ênguê.”

Ăt hlăm klei mă bruă wưng leh êgao ti dŭm ƀuôn hgŭm nah yŭ čar, Khua bruă Đảng čar lehanăn khua knơ̆ng bruă sang čư̆ êa čar Gia Lai nao ksiêm leh dŭm bruă rŭ mkra prŏng msĕ si tač golf Đăk Đoa, alŭ wăl hiu čhưn ênguê dhar kreh, wăl ƀuôn prŏng doh krĭng čư̆ hngô Pleiku lehanăn alŭ wăl sang jưh – tač golf FLC ti Đăk Đoa. Phung khua kiă kriê čar Gia Lai gĭt gai leh kjăp dŭm knơ̆ng dhar bruă, alŭ wăl mâo klei bi hgŭm jăk, jih jang bruă ngă bi djŏ hŏng klei bhiăn, čiăng kơ jih jang bruă mâo ngă hŏng klei jăk.

          Klei čar Gia Lai kut kat lŏ ngă dŭm mta bruă dôk êmưt, srăng đru bi kơrŭ bruă duh mkra hlăm krĭng nah yŭ, mkŏ mjing alŭ wăl mđĭ kyar mrâo, lehanăn mđĭ boh tŭ dưn klei djă yua lăn, lehanăn klei dưi duh bi liê hlăm alŭ wăl čar./.