Hlăm dŭm hrue anei, hlăm dŭm kdrăn lŏ ti ƀuôn A Lao, ƀuôn hgŭm Mang Yang, čar Gia Lai, gŏ sang Ngưm mbĭt hŏng lu gŏ sang mkăn, dôk bi ewiă mdiê lŏ bhang čiăng hmao jao anôk kơ bruă rŭ mkra êlan dơ̆ng pral Quy Nhơn – Pleiku. Khădah sa kdrêč lăn, khădah dôk hlăm ênoh hrui mă lăn, ƀiădah mnuih ƀuôn sang ăt tŭ ư, hŏng hdră êlan kyua klei mđĭ kyar kjăp. Ngưm lač, ƀuôn A Lao mâo 51 gŏ sang djŏ hrui mă lăn, lehanăn jih jang gŏ sang anăn mâo tŭ mă leh prăk čiu hnô, čŏng ruh jih pưk sang pô, koh druôn rŭ jih mnơ̆ng pô pla, pioh jao lăn kơ anôk mkra êlan:

“Mnuih ƀuôn sang hmei lač jăk kơ knŭk kna mâo leh hdră rŭ mkra êlan dơ̆ng anei. Jih jang mnuih ƀuôn sang hlăm ƀuôn bi sa ai hŏng bruă mkra êlan dơ̆ng. Msĕ si kdrêč lăn gŏ sang hmei, djŏ hlăm anôk čuăl mkă mkra êlan luič truh 2 sào lăn lŏ, lehanăn 1 sào kphê; hmei rŭ leh jih ana boh, lehanăn jao lăn kơ anôk rŭ mkra êlan dơ̆ng mă bruă.”

Hŏng mta kñăm, tăp anôk mâo jao leh lăn ala, snăn hlŏng mă bruă tinăn mtam, hdră mkra êlan anei jing dôk hlăm kdrêč bruă mrô 1 lehanăn mrô 3, jing anôk mâo ruh mgaih leh lăn ala êbeh 70%,dŭm êpul êya ngă bruă mâo tiŏ nao mtam dŭm êtuh boh êdeh êdâo mă bruă, hŏng dŭm êbâo čô mnuih mă bruă mă bruă truh kơ 3 lehanăn 4 gưl mtam hlăm sa hrue, hŏng jih jang djăp mta bruă kơ klei mkra êlan, êlan mđuĕ êa, bir êlan, mkra kban jơ̆ng kban, ƀăng mur.

Hlăm anăn, dŭm boh kban phŭn msĕ si kban An Nhơn, kban krông Kôn, kban Hà Nhe lehanăn kban hgao êlan dơ̆ng pral Dưr – Dhŭng dưi mă bruă hŏng jih hnơ̆ng êlâo kơ yan hjan truh. Đoàn Minh Hoàng – Pô kăp kčĕ bruă mơ̆ng knơ̆ng bruă VNC, juing êpul bruă mkra kban An Nhơn 4 brei thâo:

 “Kban An Nhơn 4, ară anei mâo ktar leh truh 12/24 anôk jeh gơ̆ng,mâo mkra truh 50% bruă pơ̆ng gơ̆ng jeh. Ară anei, pô kiă kriê bruă knuă mâo jao leh anôk mkra ƀô̆ kban, dua nah bir kban mâo mkŏ. Ară anei asei kban, hlăk dôk guôn mnơ̆ng mnuă pioh mkra bi leh kban.”

Bruă mkra êlan dơ̆ng pral Quy Nhơn - Pleiku mâo boh taih hlăm brô 125 km, hŏng ênoh duh bi liê jih jang êbeh 43.700 êklai prăk, găn hlăm 16 ƀuôn hgŭm hlăm čar  Gia Lai, hmăi djŏ hŏng êbeh 4.600 gŏ sang, hŏng ênoh hrui wĭt jih jang êbeh 1.097 ha. Truh hrue 4/5/2026, hnơ̆ng ênoh mâo jao leh anôk ala pioh mă bruă hlăm kdrêč bruă mrô 1 (22km) truh 70,5%; bi kdrêč bruă mrô 2 (25km) djăp 72%. Hjăn bruă knuă hlăm kdrêč mrô 3 (68km) hlăk dôk bi leh jih jang bruă mprăp mă bruă hlăm mlan 5/2026. Mbĭt hŏng bruă ruh mgaih anôk ala, 10/12 alŭ wăl duh mkra ala ƀuôn mrâo ăt dưi mă bruă, tĭng srăng jaop kơ mnuih ƀuôn sang hlăm mlan 6/2026.

Phạm Xuân Tỉnh, K’iăng khua anôk bruă kiă kriê kdrêč bruă mrô 1 hlăm êpul khua kiă kriê bruă mkra êlan klông čar Gia Lai brei thâo, mbĭt hŏng bruă ruh mgaih anôk ala, ngă bruă êjai anăn yơh jing hdră jăk hĭn bi pral bruă knuă tui si čar bi kčah:

 “Truh ti wưng anei, bruă ruh mgaih anôk ala dưi djăp leh kơ anôk pioh mkra êlan. Hmei mbĭt hŏng phung mkra êlan, bi mguôp hŏng dŭm anôk bruă, pioh lŏ ksiêm wĭt mnơ̆ng mnuă pioh kơ bruă mkra êlan, lehanăn jih jang mnơ̆ng anăn bi djăp ênoh čuăn, pioh kơ klei mkra êlan bi jăk.”

 Êlan dơ̆ng pral Quy Nhơn - Pleiku jing yuôm bhăn êdi hŏng čar Gia Lai, kyuadah srăng jing kdrêč mkŏ yuôm bhăn plah wah krĭng dhŭng kwar krah hŏng čư̆ čhiăng hlăm čar, mjing klei mkŏ krĭng, bi hrŏênoh bi liê hlăm klei dŭ mdiăng, lehanăn pŏk phai anôk mđĭ kyar. Kyuanăn, dŭm alŭ wăl ngă bruă hlăk mđĭ bi pral hĭn jih jang bruă knuă, rơ̆ng čiăng dưi bi leh bruă mkra êlan djŏ hŏng hdră kčah./.