Hruê (24/9), bruă Đảng čar Gia Lai mkŏ mjing leh Klei bi kƀĭn jao bruă plah wah Anôk dlăng bruă Đảng čar hŏng anôk bruă Đảng 135 să, ƀuôn hgŭm kñăm tĭng dlăng boh tŭ hdră ngă bruă mơ̆ng gru hmô bruă knŭk kna 2 gưl leh 3 mlan pŏk ngă. Hluê si klei hưn ti anôk bi kbĭn, dŭm anôk bruă Đảng, bruă knŭk kna, mặt trận čar kwar lehanăn dŭm êpul êya bruă nah gŭ ngă bruă tŭ dưn, Anôk bruă ngă hră mơar knŭk kna gưl să mkăp djŏ hŏng klei čiăng đru kơ mnuih ƀuôn sang lehanăn anôk bruă duh mkra.

Kluôm čar tŭ mă leh giăm 300.000 mta hră mơar, hlăm anăn êbeh 90% msir mghaih djŏ wưng. Ti anôk bi kƀĭn, lu klei blŭ mtă brei mđing kơ prak duh mkra mrâo anôk bruă să, ƀuôn hgŭm leh bi mŭt mbĭt; đru kơ kdrăp mrâo, thiăm mbŏ mnuih mă bruă dôk kƀah. Dŭm alŭ wăl ăt brei mkra mđĭ anôk bruă êlan klông, knơ̆ng mbông êa, sang hră, anôk bruă mdrao mgŭn, sang dhar kreh. Hluê si Khua bruă Đảng Gia Lai Hồ Quốc Dũng, dŭm să, ƀuôn hgŭm brei bi kjăp anôk bruă, bi leh hdră mkŏ mjing, thiăm mbŏ knuă druh, mkŏ mjing hdră ngă bruă klă klơ̆ng, rơ̆ng hluê ngă dŭm mta kñăm mđĭ kyar, mguôp hŏng hdră bi hrŏ ƀun kjăp, rơ̆ng klei êđăp ênang ala ƀuôn. Hồ Quốc Dũng mñă, čiăng mđĭ hĭn boh tŭ ngă bruă, lŏ dơ̆ng kah mbha gưl, klei dưi kơ dŭm să./.