Hlăm klei bi kƀĭn, bi ala kơ dŭm anôk bruă duh mkra Việt Nam leh anăn China bi trông kơ hdră msir mđĭ kyar leh anăn rơ̆ng êđăp ênang, hơĭt kjăp bruă ba čhĭ kơ ala tač êngao hlăm wưng kơ anăp. Hlăm anăn, dŭm anôk bruă duh mkra Việt Nam čang hmăng mâo đru hmao thâo kơ hdră êlan, hnơ̆ng čuăn hdră mnêč, hdră kčag mrâo leh anăn hnơ̆ng čuăn bi doh êƀăt mnơ̆ng ƀơ̆ng mrâo mơ̆ng China. Mbĭt anăn mâo hdră hâo hưn nanao kơ wưng mkra mlih mkra mjing.

 Kơ China, lu anôk bruă duh mkra lač Gia Lai brei mđing hĭn kơ klei kjăp phŭn mkăp, hnơ̆ng jăk hrăm mbĭt leh anăn klei thâo mkra mjing êlan kñăm mđĭ enoh yuôm. Lư Lệ Phương, Khua bruă mnia blei Êpul grup bi liê Vịnh Bắc Bộ (čar Quảng Tây, China brei thâo:

"Hŏng anôk bruă duh mkra mnia blei China, jing brei mđing kơ krĭng mkra mjing leh anăn mnơ̆ng dhơ̆ng mơ̆ng Việt Nam. Mâo lu mnơ̆ng dhơ̆ng lu jơr. Hruê anei, truh tinei, kâo čang hmăng ksiêm hriăm thiăm krĭng mkra mjing mơ̆ng Việt Nam kơ boh klei si srăng ngă pŏk ngă, kriê dlăng kơ hdră ba čhĭ kơ ala tač êngao. Tơdah čiăng đĭ kyar hnơ̆ng ba čhĭ kơ China snăn brei ksiêm dlăng, mkra mjing, đuh hruh mnơ̆ng dhơ̆ng bi klă.”

 Hlăm klei bi kƀĭn, dŭm tĭng bi tŭ ư kơ bruă brei mkŏ mjing dŭm hdră mkŏ, bi hrŏ bruă dôk krah wah, mbĭt anăn mđĭ bi hgŭm bruă  logistics. Nguyễn Thị Diễm Hằng, Khua Knơ̆ng bruă Vinanutrifood Bình Định, brei thâo ară anei mâo leh lu anôk bruă duh mkra Việt Nam hgŭm êlam hlăm anôk ba čhĭ China leh anăn thâo săng klă kơ hdră êlan djŏ tuôm. Anei jing klei găl prŏng čiăng mđĭ kyar dŭm krĭng mnơ̆ng pioh mkra mjing djăp hnơ̆ng čuăn ti Gia Lai.

“ Hmei păn kjăp leh jing yuôm bhăn hĭn anăn jing klei klă mngač mơ̆ng bruă kriê dlăng krĭng pla mjing truh kơ sang mkra mjing. Yuôm bhăn hĭn jing drei čhĭ leh ya mnơ̆ng China čiăng. Hmei yua AI, ba hlăm ênoh mrô dŭm tur knơ̆ng China, klei mĭn tĭng yan hrui pĕ hnưm, yan kơ hnơ̆ng mnơ̆ng dhơ̆ng mkŏ hŏng krĭng pla mjing ti Việt Nam čiăng dưi ba mnơ̆ng dhơ̆ng djŏ yan leh anăn djăp hnơ̆ng kơ anôk ba čhĭ”

 Hlăm klei bi kƀĭn, mâo leh 7 hră bi hdơr bi hgŭm bi siñê plah wah anôk bruă duh mkra Gia Lai leh anăn anôk bruă duh mkra China. Nguyễn Tuấn Thanh,  K’iăng Khua Knơ̆ng bruă Sang čư̆ êa čar Gia Lai bi mklă, čar dôk kƀĭn bi leh klei găl čiăng mjing anôk găl ênưih hĭn kơ anôk bruă duh mkra, hlăm anăn mâo phung bi liê ala tač êngao leh anăn anôk bruă duh mkra China:

"Čar Gia Lai mđing kƀĭn bi leh bruă êlan klông kluôm čar, anôk bruă nah gŭ dŭm wăl tuh tia mkra mjing, bruă mkra mlih hră mơar kơ klei bi liê mkŏ mjing, jia, mŭt hlăm ala čar. Hriê hŏng Gia Lai, dŭm anôk bruă duh mkra, phung bi lê srăng dưi mjing djăp klei găl čiăng hlue ngă hdră bruă tŭ jing leh anăn đĭ kyar kjăp.”

Ară anei, Gia Lai mâo giăm 1 êklăk ha lăn mkra mjing lŏ hma hŏng dŭm krĭng thơ̆ng pla mjing hnơ̆ng prŏng. Hlăm anăn, kphê jing ana pla mjing phŭn, hŏng êbeh107.000ha, hnơ̆ng boh grăp thŭn êbeh 333.000 ton. Dŭm mta ana durian, tiu, kñŭl, ksu, mtei, čêñ hruĕ, hbei tao, boh đung, amrêč… ăt mâo ênhă mơ̆ng dŭm êbâo truh kơ dŭm pluh êbâo ha, ngă djŏ  hnơ̆ng čuăn kơ klei ba čhĭ ti ala tač êngao.