Msĕ si klei leh hưn, tlam 22/1/2026, Klei bi kƀĭn prŏng phung bi ala kluôm ala gưl XIV mơ̆ng Đảng ruah leh Êpul khua kiă kriê bruă Đảng gưl dlông, gưl 14 mâo 200 čô phung khua êmua, hlăm anăn mâo 180 čô khua êmua klă klơ̆ng, lehanăn 20 čô jing khua mkăp.

Aguah anei 23/1, Klei bi kƀĭn tal êlâo Êpul khua kiă kriê bruă Đảng gưl dlông gưl 14 mâo leh klei bi kƀĭn ruah Phŭn bruă kđi čar, ruah khua gĭt gai Đảng, ruah êpul khua kiă kriê bruă Đảng, hmư̆ klei hâo mdah kơ hdră êlan ruah mdưm phung khua knơ̆ng hlăm Đảng, Knŭk kna lehanăn mă klei blŭ kơ mnuih păn ngă hlăm dŭm bruă hlăm Êpul khua kiă kriê, ruah anôk bruă ksiêm dlăng gưl dlông, ruah khua kiă kriê anôk bruă ksiêm dlăng gưl dlông.

Êpul khua kiă kriê bruă Đảng gưl dlông gưl 14 mâo leh klei bi tŭ ư lŏ ruah Tô Lâm, Khua knơ̆ng kiă kriê bruă Đảng gưl dlông 13 lŏ dơ̆ng păn ngă khua gĭt gai Đảng gưl XIV.

Khua gĭt gai Đảng Tô Lâm mâo leh lu bruă ngă hlăm klei kiă kriê Đảng lehanăn tă êlan kơ klei mđĭ kyar lăn čar, yap mơ̆ng leh êpul khua kiă kriê bruă Đảng gưl dlông gưl 13, ruah ñu jing khua gĭt gai gưl dlông Đảng Cộng sản Việt Nam XIII hlăm mlan 8/2024.

Klei bi mlih yuôm bhăn hlăm bruă dăp wĭt, bi khuăt êpul khua kiă kriê hlue hdră mtrŭn mrô 18-NQ/TW mâo ngă leh hŏng klei pral, ti hnơ̆ng prŏng yap mơ̆ng êlâo dih truh kơ ară anei, lehanăn mâo ba wĭt boh tŭ dưn prŏng, bi hrŏ klei dôk krah wah, mbha gưl klei dưi kiă kriê kjăp hĭn, jĕ mnuih ƀuôn sang hĭn, mă bruă kơ mnuih ƀuôn sang jăk hĭn, mjing leh klei găl kơ klei mđĭ kyar bruă duh mkra ala ƀuôn hlăm wưng tinăp.

Mơ̆ng knal jih thŭn 2024 truh ară anei, Phŭn bruă kđi čar mâo mtrŭn leh 9 hdră mtrŭn kơ dŭm bruă knơ̆ng hlăm lăn čar. Jing leh dŭm hdră êlan prŏng, mđrăm hlăm jih jang, bi êdah klei mlih mrâo, hŏng hdră êlan dưi thâo ƀuh kjăp kơ êdei anăp, lehanăn klei kut kta mơ̆ng bruă kđi čar mơ̆ng Đảng; mjing atur atăt lăn čar đĭ kyar hlăm ênuk gưl mrâo./.

Klei hdĭp Tô Lâm

Khua gĭt gai gưl dlông Đảng gưl XIV

- Hrue kkiêng:  10/7/1957        Êkei/mniê: Êkei         Djuê ana: Yuăn.

- Ƀuôn sang: Să Nghĩa Trụ, kdriêk Văn Giang, čar Hưng Yên.

- Găp djuê: Knuă druh.

- bruă knuă leh mâo hrŏng ruah: Hđeh hriăm hră

- Hrue dưi hrŏng ruah hlăm kahan ksiêm yang ƀuôn: 10/1974.  

- hrue mŭt Đảng: 22/8/1981.       Hrue klă klơ̆ng: 22/8/1982

- Yhnơ̆ng thâo mâo mjuăt bi hriăm:

        + hriăm hră mơar: 10/10.

        + Hnơ̆ng hriăm bruă: Gưl prŏng An ninh nhân dân.

        + Học hàm, học vị: Nai prŏng, Nai prĭn.

        + Hnơ̆ng thâo bruă kđi čar: gưl dlông.

        + klei tue: Angle C

Khua gĭt gai Đảng Tô Lâm jing khua hlăm phŭn bruă kđi čar gưl XII, XIII, XIV; Khua hlăm bruă Đảng gưl dlông, gưl XI, XII, XIII, XIV; Pô bi ala bruă kƀĭn ala gưl XIV, XV.

Hrue 22.1.2026, ti Anôk bi kƀĭn prŏng phung bi ala kluôm ala gưl 14 mơ̆ng Đảng, ñu djŏ ruah jing khua hlăm êpul bruă Đảng gưl dlông, gưl XIV, wưng păn bruă 2026 - 2031.

Aguah 23.1.2026, ti Anôk bi kƀĭn tal êlâo Êpul khua kiă kriê bruă Đảng gưl dlông gưl XIV, ñu djŏ ruah jing khua hlăm phŭn bruă kđi čar gưl XIV lehanăn djŏ ruah jing khua gĭt gai Đảng gưl XIV.