Adei Siu Thuý, adŭ 6A, Sang hră gưl sa lehanăn gưl dua Čư̆ Dăng Ya, să Biển Hồ čar Gia Lai (să Čư̆ Dăng Yan, kdriêk Čư̆ Pah hđăp) mrâo bi leh hdră ksiêm dlăng wưng 1. Thúy brei thâo, 5 thŭn dôk hriăm gưl sa ñu mâo boh tŭ êdah kdlưn, kyua anăn amâo đei dleh ôh hlăm klei bi lông anei. Mbĭt anăn, ti anôk hriăm hlŏng dôk yang hruê, mâo nai mtô ktrâo lač, kyua anăn Thúy hĭn mơh lŏ gĭr hriăm jăk hĭn.

 “Nai mtô ti sang hră jăk jĭn lehanăn mđing nanao kơ hmei. Bi hmei srăng gĭr hriăm hră jăk, čiăng kơ nai lehanăn amĭ ama mơak”.

Mbĭt hŏng bruă mkra mđĭ anôk bruă nah gŭ, sang hră – adŭ hriăm, hnơ̆ng tŭ jăk bruă mtô bi hriăm ti krĭng mnuih djuê ƀiă ti čar Gia Lai dưi mkra mđĭ klă sĭt. Adei Rmah H’Ý, adŭ hriăm 5B, Sang hră gưl sa – gưl dua Čư̆ Dăng Ya brei thâo, mâo nanao klei hrăm mbĭt mơ̆ng phung nai, sang hră hlăm klei hriăm. Amâo djŏ knŏng mblang ênưih thâo săng, gĭr mtô grăp čô, phung nai lŏ mđing dlăng kơ klei hdĭp grăp gŏ sang čiăng mâo klei mđĭ ai, đru kơ phung hđeh. Mơ̆ng anăn, đru kơ phung hđeh ƀrư̆ hruê ƀrư̆ mđĭ hĭn hnơ̆ng thâo:

 “Nai mtô mđing êdi kơ phung adei, đru kơ phung adei. Mmông hmei dleh dlan phung nai ăt đru mơh. Mơ̆ng anăn, boh tŭ klei hriăm ăt đĭ lu mơh. Kâo čang hmăng êdei adih kâo srăng dưi jing Kahan ksiêm”.

Hluê si Aduôn Rmah H’Ngát ti ƀuôn Xoá, să Biển Hồ, čar Gia Lai, hnơ̆ng tŭ jăk bruă mtô bi hriăm ti ƀuôn amâo djŏ knŏng dưi mđĭ kbiă hriê mơ̆ng dŭm boh sang prŏng siam lehanăn phung nai mtô khăp kơ bruă, khăp kơ hđeh. Hnơ̆ng tŭ jăk dưi mkra mđĭ kbiă hriê mơ̆ng klei mđing dlăng mơ̆ng Đảng, Knŭk kna, đru kơ phung hđeh prăk tăk hriăm, ênoh bi liê hlăm klei hdĭp aguah tlam, mkăp braih, mnơ̆ng yua hlăm klei hriăm hră… Kyua mâo dŭm hdră mtrŭn anei, gŏ sang dul ƀiă klei ktrŏ, phung hđeh mâo klei găl dưi nao sang hră jăk hĭn. Aduôn Rmah H’Ngát brei thâo:

 “Lač jăk kơ Đảng, Knŭk kna mâo leh dŭm hdră mtrŭn mđing kơ anak čô hmei, dưi mâo klei găl nao sang hră, dưi hriăm hră jăk hĭn. Phung čô anak hmei hriăm hră ƀrư̆ hruê ƀrư̆ thâo hĭn, hmei mơak êdi”.

Nguyễn Chiến Thắng, Khua kiă kriê Sang hră gưl sa – gưl dua Čư̆ Dăng Ya brei thâo, sang hră mâo 90% phung hđeh jing mnuih djuê ana ƀiă, lu jing mnuih Jarai. Dŭm hdră mtrŭn đru mơ̆ng Knŭk kna kơ phung hđeh hriăm hră lehanăn phung nai mtô ti krĭng 3, đru mđĭ leh hnơ̆ng tŭ bruă mtô lehanăn bi hriăm mơ̆ng Sang hră ƀrư̆ hruê dưi mkra mđĭ.

 “Kyua mâo klei mđing dlăng mơ̆ng dŭm hdră mtrŭn mơ̆ng Đảng, Knŭk kna msĕ snăn, klei thâo săng mơ̆ng phung amĭ ama hlŏng truh kơ phung hđeh hriăm hră thŭn hriăm ti anăp brei thâo hĭn kơ thŭn dôk hriăm. Mnuih ƀuôn sang hơĭt ai tiê atăt ba čô anak nao sang hră, boh nik phung amĭ ama mâo klei mđing dlăng, khădah dleh dlan dưn ăt brei anak čô gĭr nao sang hră djăp ênŭm. Sang hră ăt đăo knang, ngă msĕ snăn, sa wưng dơ̆ng năng ai hnơ̆ng thâo mơ̆ng mnuih ƀuôn sang srăng đĭ lu hĭn”. 

Hluê si Nguyễn Đăng Quang, Khua anôk bruă sang čư̆ êa să Gào, anôk mâo êbeh mkrah wah jing mnuih ƀuôn sang djuê ana ƀiă, klei tŭ jing mơ̆ng hdră mtrŭn mjuăt bi hriăm hŏng krĭng mnuih ƀuôn sang djuê ana ƀiă hlăm lu thŭn êgao dưi mđĭ hĭn. Mơ̆ng anăn, bruă ba yua kdrăp mrâo hlăm hdră pla mjing ƀrư̆ hruê ƀrư̆ tŭ dưn, klei hdĭp mnuih ƀuôn sang dưi mkra mđĭ klă sĭt. Boh nik, ênoh anak aneh mnuih djuê ana ƀiă dưi mŭt hriăm gưl prŏng, gưl krah amâo dah nao hriăm bruă ƀrư̆ hruê ƀrư̆ lu. Mơ̆ng anăn, mjing sa êpul mnuih mă bruă mâo klei thâo, mkăp kơ hdră mđĭ kyar bruă duh mkra, ala ƀuôn ti alŭ wăl.

 “Klei mđing dlăng hlăm bruă mtô bi hriăm mơ̆ng Đảng, Knŭk kna drei djŏ klă, boh nik ti dŭm krĭng taih kbưi. Hnơ̆ng thâo ƀrư̆ hruê dưi mkra mđĭ, phung hđeh dưi hriăm gưl prŏng ăt lu mơh. Tĭng kơ alŭ wăl hmei mkŏ mjing êpul knuă druh tinei mtam, leh phung hđeh ruê̆ hriăm gưl prŏng hmei srăng mkŏ mjing êpul knuă druh lŏ čuê ti alŭ wăl”.

Dŭm hdră mtrŭn djŏ klă mjing leh klei bi mlih prŏng hlăm krĭng mnuih ƀuôn sang djuê ƀiă ti čar Gia Lai lehanăn hlăm kluôm ala. Phung hđeh mâo klei găl dưi nao sang hră, phung nai mtô hơĭt ai tiê dôk mtô bi hriăm ti sang hră, adŭ hriăm, anôk bruă nah gŭ ƀrư̆ hruê dưi bi leh. Mơ̆ng anăn, hnơ̆ng tŭ hdră mtô lehanăn bi hriăm dưi mkra mđĭ klă sĭt, hnơ̆ng thâo đĭ nanao hlăm grăp thŭn. Anei jing tur knơ̆ng yuôm bhăn čiăng mkŏ mjing mnuih mă bruă mâo klei thâo, đru mtrŭt mđĭ kyar bruă duh mkra hơĭt kjăp ti krĭng taih kbưi, krĭng mnuih djuê ana ƀiă./.