Knơ̆ng bruă gưl dlông mặt trận čar kwar Việt Nam bi hgŭm hŏng Knơ̆ng bruă ƀiêr - kpiê - êa mmih Sài Gòn (SABECO) mkŏ mjing hdră “Sa mnâo Tết Việt – bi mguôp djăp kwar” ti să Kim Bảng, čar Nghệ An.  Anôk bruă mkŏ mjing mđup brei leh 500 hnư mnơ̆ng Tết, grăp hnư mâo ênoh 900 êbâo prăk mâo mnơ̆ng leh anăn prăk, đru kơ dŭm gŏ êsei ƀun, giăm ƀun ti alŭ wăl.

Hdră lŏ mkŏ mjing lu bruă ngă dhar kreh djuê ana msĕ si tŭk knă, hưn mdah mnơ̆ng Tết krĭng Nghệ, bi lông đŭng điŏ, hlăp lêñ djuê ana, iêô jak lu mnuih ƀuôn sang hgŭm. Gưl anei, anôk bruă mkŏ mjing ăt nao čhưn leh anăn mđup brei 20 êklăk prăk kơ knuă druh, lĭng kahan Kđông kahan răng mgang knông lăn 561 ƀăng jang knông lăn Thanh Thủy, mđĭ ai êpul ngă bruă anôm phŭn. Anei jing sa hlăm bruă ngă mđup brei 6500 hnư mnơ̆ng Tết ti 16 čar, ƀuôn prŏng kluôm ala.