Hluê si phung bi ala, wưng păn bruă Klei kƀĭn prŏng 13, Êpul khua bruă Đảng gưl dlông, Phŭn bruă kđi čar, Êpul khua bruă Đảng mâo klei kjăp, bi mguôp, sa ai, krơ̆ng kjăp hdră bhiăn, nao klă hŏng klei mĭn, hdră êlan, gĭt gai lăn čar găn djăp klei dleh dlan, klei lông dlăng, bi leh dŭm mta kñăm bruă klam, hdră mtrŭn klei kƀĭn prŏng Đảng tal 13 bi êdah leh, hlăm anăn mâo lu bruă klam dưi bi leh jăk, bi trông hlăm Êpul, Khua Knŭk kna Phạm Minh Chính mnă ktang kơ klei hriăm bi mguôp:

"Bruă tal 1 jing bi mguôp. Amâo mâo klei bi mguôp si thâo mrâo hruê anei. Drei mâo klei mĭn kjăp, bi mguôp hlăm bruă êpul, bi mguôp hŏng tač êngao kơh drei dưi mâo kơhưm, mâo klei blŭ. Anei jing boh klei phŭn. Hlăk mblang tinei amâo djŏ knŏng kơ kluôm Đảng ƀiădah wăt kơ anôk bruă alŭ wăl jiă kma ai tiê bi mguôp. Bi mguôp thâo săng hdơ̆ng pô, bi kah mbha, đa đa bi asăn asei mlei”.

Dŭm klei blŭ mguôp mñă ktang lŏ dơ̆ng thâo săng kơ ênuk mrâo leh anăn gĭr ngă 2 mta kñăm 100 thŭn mâo hdră mtrŭn klei kƀĭn Prŏng Đảng tal 13 bi klă: mta kñăm ti anăp thŭn 2030 jing jing bi hdơr 100 thŭn mkŏ mjing Đảng leh anăn jing sa ana čar hlăk đĭ kyar mrâo mrang, hnư hrui wĭt kah knar lu. Thŭn 2045, bi hdơr 100 thŭn mkŏ mjing lăn čar, jing ala čar yang ƀuôn ngă phŭn đĭ kyar mâo hnư hrui wĭt lu. Čiăng dưi mâo mta kñăm anei, pô bi ala Đỗ Tiến Sỹ, pô bi ala bruă Đảng Knŭk kna hưn:

"Năng ai srăng nao êlam hĭn hlăm klei kdlưn hĭn mđĭ kyar klei kreh knhâo mrâo mrang, mlih mrâo mbruă leh anăn bi mlih mrô ala čar leh anăn čiăng sơnăn msĕ hŏng klei Khua gĭt gai Đảng lač jing kdlưn hĭn hlăm bruă hluê ngă hdră mtrŭn klei kƀĭn prŏng tal 14 kdlưn hĭn mkă hŏng klei kƀĭn êlâo dih, ktrâo klă pô, klă hdră čiăng ngă hdră mtrŭn klei kƀĭn prŏng 14. Hmei ƀuh mta phŭn kdlưn hĭn mđĭ kyar klei kreh knhâo mrâo mrang, mlih mrâo mbruă leh anăn bi mlih mrô ala čar hmăi kơ êpul mkra mjing, klei mă bruă, hdră êlan mkra mjing čiăng mkŏ mjing ai dưi mrâo hlăm bruă duh mkra. Hlăm wưng mrâo srăng mđĭ kyar klei kreh knhâo mrâo mrang, mlih mrâo mbruă leh anăn bi mlih mrô ala čar.”

Hluê si pô bi ala Trần Phước Sơn, Êpul bruă Đảng ƀuôn prŏng Đà Nẵng, čiăng dưi mâo dŭm mta kñăm mđĭ kyar bruă duh mkra truh thŭn 2030, tă hdră truh thŭn 2045 čiăng bi klă gru hmô đĭ kyar mrâo, mkŏ wĭt bruă duh mkra, mtrŭt mđĭ klei bi mrâo mrang, mă klei kreh knhâo mrâo mrang, mlih mrâo mbruă leh anăn bi mlih mrô jing boh kdrŭt:

 " Mñă bi klă hdră bhiăn leh anăn klei čuăn mơ̆ng gru hmô đĭ kyar mrâo. Anei jing gru hmô mđĭ kyar kluôm, bi mguôp bi kna pla wah klei mkăp brei leh anăn klei čiăng, hluê si klei mlih mrâo mbruă, klei kreh knhâo mrâo mrang, klei kiă kriê, mnuih mă bruă hnơ̆ng jăk leh anăn bruă duh mkra mrô. Tal 2 bi klă 3 kmeh gơ̆ng mkŏ wĭt bruă duh mkra, anăn jing dhar bruă, mta bruă hluê hdră bruă tuh tia mkra mjing, bi mrâo mrang mtah leh anăn mlih mrô. Mkŏ wĭt wăl đĭ kyar hluê kiêng đĭ kyar, êlan knhal bruă duh mkra leh anăn bruă duh mkra êa ksĭ. Mkŏ wĭt knơ̆ng bruă, ai dưi čiăng mđĭ hĭn boh tŭ dưn leh anăn ai bi ktưn.”

Phung bi ala lač, gưl tal êlâo hdră ngă bruă dưi čih hlăm hră mơar. Klei anăn brei ƀuh klei gĭr amâo mâo mdei knŏng hdră tă, ƀiădah lŏ jing ai hdĭp mơ̆ng yang ƀuôn. Hdră ngă bruă phŭn jing klei bi klă kơ klei hmăng hmưi đĭ kyar. Pô bi ala Phan Văn Mãi, êpul bi ala bruă Đảng Bruă Kbĭn ala mñă:

"Mñă jing mkŏ mjing hdră êlan mđĭ kyar anôk bruă duh mkra phŭn gưl ala čar, hlăm anăn kñăm kơ dua krĭng bruă duh mkra phuĭn nah Dưr leh anăn nah Dhŭng. Kyua klei găl mơ̆ng dua krĭng anei prŏng sơnăk. Ẹẹai bruă duh mkra hŏng hnơ̆ng prŏng krĭng anei dưi mkŏ čiăng mâo hnơ̆ng srăng dưi bi lar klei găl. Tơdah dua krĭng mâo hdră êlan mđĭ kyar ktang, găl guop srăng dưi mđĭ kyar lăn čar”.

Dŭm klei blŭ mguôp hlăm êpul ăt bi tŭ ư mđing truh mkŏ mjing yang ƀuôn Việt Nam jăk siam, hdră bhiăn, êđăp ênang leh anăn mđĭ kyar. Mta kñăm ti anăo jing bi kjăp yang ƀuôn hŏng klei mpŭ kơ hdră bhiăn lăn čar, mlih mrâo hră mơar Knŭk kna, gang mkhư̆ klei ƀơ̆ng ngăn, klei luč liê mang, klei amâo mâo jăk, mkŏ mjing êpul knuă druh kpă ênuah, jih ai tiê, jhŏng mĭn, jhŏng ngă, jhŏng đua klam čiăng kơ hdră bhiăn lăn čar nao mbĭt hŏng ai tiê mnuih ƀuôn sang./.