Ti sang bi kƀĭn adŭ bruă kahan ksiêm kiă kriê bruă hră mơar lehanăn klei êđăp ênang yang ƀuôn (mrô 50 Lý Tự Trọng, ƀuôn hgŭm Buôn Ma Thuột, čar Daklak), dŭm êtuh čô đảng viên hlăm bruă Đảng Knơ̆ng bruă dhar kreh, mjuăt asei mlei lehanăn hiu čhưn ênguê, anôk bruă jia Daklak nao ngă kak mrâo. Đảng viên Hồ Văn Tĩnh brei thâo, klei ngă kak đảng viên anei pral êdi:

“Snăn, leh ngă jih jang klei hưn knơ̆ng luič mơ̆ng 3 – 5 mnĭt, dôk guôn hlam brô mơ̆ng 5 – 7 mnĭt, snăn jih jang knŏng luič mă mơ̆ng 10 – 15 mnĭt. Tal êlâo, êpul kahan ksiêm ktrâo atăt anôk mă rup, leh kơ anăn êmuh jih jang klei čiăng čih mdê bi pô hlăm hră mơar đảng viên msĕ si: hrue mlan thŭn kkiêng, hrue mŭt Đảng, ƀuôn sang, anôk dôk… Tơdah jih jang klei hưn anăn djŏ trĭp, snăn jing leh hlăm bruă mlih ngă kak đảng viên mrâo.”

          Ti anôk bi mlih mơ̆ng kahan ksiêm ƀuôn hgŭm Ea Kao, čar Daklak, mâo dŭm pluh čô phung đảng viên nao ngă klei bi mlih. Đảng viên Trần Quang Thống, 65 thŭn, dôk hlăm êpul bruă Đảng Êpul anôk dôk mrô 11, ƀuôn hgŭm Ea Kao lač, klei bi mlih anei mă bruă bŏ hŏng klei găl ênưih:

          “Kâo mŭt Đảng thŭn 1984, truh ară anei mâo leh dua blư̆ bi mlih kak đảng viên, hlăk dôk hlăm lĭng kahan. Tal anei, nao bi mlih čiăng mâo kak dưm  chip bi djŏ hŏng mta mtrŭn mrâo mơ̆ng Êpul khua kiă kriê bruă Đảng gưl dlông, kiă kriê phung đảng viên bi jăk hĭn, lehanăn mkŏ mjing dŭm êpul bruă đảng nah gŭư bi kjăp hĭn. Phung kahan ksiêm klam ngă bruă bi mlih kak anei bŏ hŏng klei hur har, kjăp pral knŏng luič mă ƀiă mnĭt leh yơh.”

          Čar Daklak leh klei bi mŭt mbĭt mâo êbeh 137.000 čô đảng viên, dôk hlăm êbeh 5.200 êpul bruă đảng. Hlue ngă asăp mtrŭn mrô 51 mơ̆ng êpul khua kiă kriê bruă Đảng lehanăn hdră mơ̆ng phŭn bruă kahan ksiêm, kahan ksiêm čar kiă kriê leh adŭ bruă kahan ksiêm kiă kriê klei kơ hră mơar, lehanăn klei êđăp ênang yang ƀuôn, mbĭt hŏng kahan ksiêm 102 boh ƀuôn hgŭm, mbha mnuih lehanăn tiŏ nao ngă bruă čiăng hmao hrui lehanăn ngă mnrâo klei bi mlih kak đảng viên. Leh êbeh sa hrue kăm mă bruă mâo bi mlih leh truh êbeh 70.000 pŏk kak, jing êbeh 50% hdră kčah, tui si tĭng hlăm hrue kăm anei, bruă bi mlih kak jing čiăng ênŭm leh, kdlưn hĭn hŏng hdră kčah. Thiếu tá Lê Đình Đô, K’iăng khua adŭ bruă kahan ksiêm kiă kriê bruă hră mơar, lehanăn klei êđăp ênang yang ƀuôn, kahan ksiêm car, brei thâo:

“Anôk bruă čŏng kčĕ kơ phung khua kiă kriê kahan ksiêm čar mprăp kdrăp mă bruă kơ 102 boh ƀuôn hgŭm hlăm kluôm čar hlue ngă bruă hrui mă kak đanrg viên hđăp. Êngao anăn, tĭng nah ngŏ čar Daklak dăp dua anôk bi mlih kak đảng viên hlăk dôk mă bruă tinăn, bi lŏng alŭ wăl nah yŭ čar mâo dăp hlăm 3 anôk, mă bruă mtam 3 gưl 4 phung, jih hrue mlam wăt hrue mdei, lehanăn knăm kjuh hlăm klei hrui mă kak đảng viên hđăp.”./.