Ƀri wưng bi hdơr 96 thŭn hruê mkŏ mjing Đảng, Klei kƀĭn prŏng kluôm ala tal 14 mơ̆ng Đảng tŭ jing jăk siam, bi hdơr 80 thŭn hruê mplĕ hră ruah khua kluôm tal êlâo ruah Bruă Kbĭn ala Việt Nam leh anăn mprăp drông tết knhuah gru Bính Ngọ, aguah mbruê, Khua Bruă Kbĭn ala Trần Thanh Mẫn nao myơr brui mngưi bi hdơr kơ Khua hlăm Bruă Kbĭn ala Bùi Bằng Đoàn ti wăl kriê pioh să Ứng Thiên, ƀuôn prŏng Hà Nội, ayang khua gĭt gai Đảng Trường Chinh, ayang khua Bruă Kbĭn ala Lê Quang Đạo; nao hơêč hmưi tết khua gĭt gai Đảng hđăp Nông Đức Mạnh, khua Bruă Kbĭn ala hđăp Nguyễn Thị Kim Ngân. Khua Bruă Kbĭn ala mñă klă, dŭm gưl phung bi ala Bruă Kbĭn ala hruê anei ăt hluê ngă klei mĭn prŏng mơ̆ng phung nao êlâo, amâo mâo mdei mjuăt bi hriăm, đru mguôp mkŏ mjing Bruă Kbĭn ala ƀrư̆ hruê ƀrư̆ êngiê, hdră bhiăn, thơ̆ng kơ bruă, mrâo mrang, năng hŏng klei đăo knang mơ̆ng Đảng, Knŭk kna leh anăn mnuih ƀuôn sang.

Khua Bruă Kbĭn ala Trần Thanh Mẫn mñă klă, hlăm wưng kơ anăp, Bruă Kbĭn ala srăng lŏ dơ̆ng mlih mrâo klei mkŏ mjing, klei ngă bruă, bi mrâo mrang leh anăn djăp ênŭm dŭm klei čuăn hlăm boh sĭt hlăm ênuk mrâo mơ̆ng lăn čar.

Lŏ dơ̆ng gĭr ktưn, mlih mrâo knhuah mă bruă, mlih mrâo ktang klei mĭn mkŏ mjing hdră bhiăn, hluê êlan mkiŏ mjing leh anăn ktrâo atăt đĭ kyar, mtrŭt mđĭ hdră êlan kdlưn hĭn, mkŏ mjing wăl mđĭ kyar mrâo, bi kluôm, hrăm mbĭt klei kiă kriê čiăng đĭ kyar pral, hơĭt kjăp lăn čar, gĭr ngă tŭ dưn gru hmô “Bruă Kbĭn ala mrô”.