Bi hdơr 80 thŭn hruê krŭ kdơ̆ng mlan 8 tŭ jing leh anăn hruê mkŏ mjing lăn čar Việt Nam, aguah mbruê 19/8 ti Hà Nội mkŏ mjing knăm ba jao sang Bắc Bộ Phủ hlăm hdră mkra mđĭ rŭ mdơ̆ng anôk bruă mă anôk bruă Khua lăn čar. Sang Bắc Bộ Phủ ti mrô 2 êlan Lê Thạch, Hoàn Kiếm, Hà Nội jing alŭ wăl hƀuê ênuk yuôm bhăn mơ̆ng Hà Nội, mơ̆ng lăn čar, anôk khua gĭt gai Hồ Chí Minh mă bruă hlăm dŭm hruê tal êlâo mơ̆ng lăn čar Việt Nam Dân chủ Cộng Hòa.

Sang dưi djă pioh jih hnơ̆ng msĕ hŏng mphŭn leh anăn lŏ mkra mđĭ ta tač, bi mâo djăp klei čiăng mrâo mrang, djŏ hŏng kơhưm lăn čar. Bắc Bộ Phủ srăng lŏ dơ̆ng čuê klei yăl dliê kơ hƀuê ênuk kơ phung êdei anăp, mbĭt anăn mâo bruă klam jing bi hmô kơ lăn čar hlăm bruă hŏng tač êngao gưl dlông, bi ala kơ rup lăn čar, anak mnuih Việt Nam hŏng mah jiăng tar rŏng lăn.