Hruê mbruê 30/12, ti Hà Nội, Anôk bruă kđi čar ala čar Hồ Chí Minh mkŏ mjing knăm ksiêm wĭt klei mă bruă thŭn 2025 leh anăn hluê ngă bruă klam thŭn 2026. Khua gĭt gai Đảng Tô Lâm nao hgŭm leh anăn blŭ gĭt gai.

Lŏ bơ̆k bâo klei mtă mơ̆ng khua gĭt gai Hồ Chí Minh: “Mtô mjuăt bi hriăm knuă druh jing bruă phŭn mơ̆ng Đảng”, Khua gĭt gai Đảng Tô Lâm mñă klă, Anôk bruă jing anôk bi kƀĭn klei mĭn, klei thâo kđi čar leh anăn boh tŭ klei hlăk mblang mơ̆ng Đảng, anôk bruă ksiêm duah klei hlăk mblang kđi čar mrô 1 mơ̆ng lăn čar, jing anôk đăo knang hlăm bruă mtô mjuăt, bi hriăm knuă druh, boh nik jing knuă druh gưl hdră êlan. Hlăm wưng kluôm Đảng, jih jang mnuih ƀuôn sang, jih jang lĭng kahan dôk mđing truh kơ klei kƀĭn kluôm tal 14 mơ̆ng Đảng hŏng klei hmăng hmưi pŏk sa wưng đĭ kyar mrâo, Khua gĭt gai Đảng Tô Lâm mñă klă, hlăm wưng kơ anăp, anôk bruă kđi čar ala čar Hồ Chí Minh srăng kñăm hluê ngă 6 hdră tă leh anăn bruă klam phŭn, lŏ dơ̆ng mligh mrâo hdră mtô mjuăt, bi hriăm knuă druh hluê êlan klă klơ̆ng, tŭ dưn mrâo mrang, nao mbĭt hŏng klei čuăng mkŏ mjing ngă bruă hluê dŭm hdră mtrŭn hdră êlan mơ̆ng Đảng.