Hlăm anăn, Klei čih mkra hră hưn bruă kđi čar bi mguôp 3 klei hâo mdah (Hâo mdah bruă kđi čar, bruă duh mkra – ala ƀuôn lehanăn hdră ksiêm wĭt bruă mkŏ mkra Đảng) mjing sa hdră kluôm, mâo mta phŭn, khuăt, ênưih thâo săng, ênưih hdơr, ênưih pŏk ngă.

Hdră hluê ngă Hdră mtrŭn Klei bi kƀĭn prŏng tal XIV mơ̆ng Đảng lač klă “Pô phŭn, hdră, klei găl mâo, anôk bi kčah knhal tuič” čiăng pŏk ngă. Khua gĭt gai Đảng Tô Lâm lač klă: Klei găl mâo, kơhưm hlăm tač êngao mơ̆ng ala čar dưi mâo msĕ hruê anei jing klei bi mguôp mơ̆ng knhuah gru dhar kreh đưm dŭm êbâo thŭn mkŏ mkra, răng mgang ala čar; jing boh tŭ mơ̆ng 96 thŭn mkŏ mkra lehanăn mđĭ kyar ala čar gŭ klei gĭt gai mơ̆ng Đảng, boh tŭ 40 thŭn mlih mrâo, jing klei săn asei mơ̆ng lu phung lĭng kahan cách mạng, đảng viên cộng sản, mnuih ƀuôn sang jih ai tiê ngă bruă duh mkra, jhŏng kmlăn, săn asei. Kơ mta kñăm mđĭ kyar ala čar wưng thŭn 2026 – 2030 lehanăn hnơ̆ng trah dlăng thŭn 2045, Khua gĭt gai Đảng brei thâo, rơ̆ng kjăp wăl anôk êđăp ênang, mđĭ kyar pral, hơĭt kjăp ala čar, mkra mdĭ klei hdĭp mnuih ƀuôn sang, čŏng pô kpưn đĭ hơĭt kjăp hlăm ênuk gưl mrâo mơ̆ng djuê ana. Gĭr mâo hnơ̆ng đĭ kyar GDP mơ̆ng 10%/thŭn kơ dlông, hnư hrui wĭt grăp čô thŭn 2030 mâo 8.500 USD.

Čiăng bi sĭt mta kñăm, hưn mdah bruă kđi čar bi mklă 12 hdră êlan prŏng, 6 bruă klam phŭn lehanăn 3 boh kdrŭt yuôm. Khua gĭt gai Đảng lač, mŭt hlăm wưng Klei bi kƀĭn prŏng tal XIV brei ngă jăk hĭn, pral hĭn, ngă bi truh. Ti gŭ hla čhiăm gru kdrưh kơang mơ̆ng Đảng, kluôm Đảng, jih jang mnuih ƀuôn sang, lĭng kahan brei sa ai, krơ̆ng kjăp klei đăo knang, mđĭ klei đua klam, klei thâo, krŭ wĭt klei čang hmăng, ngă kơ grăp thŭn, grăp mlan, grăp hruê leh Klei bi kƀĭn dưi mâo boh tŭ klă sĭt, mâo klei bi mlih jăk, čiăng mnuih ƀuôn sang ƀuh, đăo knang, sa ai, hrăm mbĭt lehanăn dưn boh tŭ./.