Khua gĭt gai Đảng Tô Lâm bi mklă , kreh knhâo kdrăp mrâo jing boh kdrŭt phŭn hlăm hdră mđĭ kyar bruă duh mkra ala ƀuôn mơ̆ng lu ala čar dlông rŏng lăn đru mđĭ hnơ̆ng mă bruă leh anăn klei bi ktưn mơ̆ng grăp ala čar. Kyua anăn, hŏng hdră kñăm jing ala čar tuh tia mkra mjing mrâo mrang hlăm thŭn 2030 leh anăn ala čar đĭ kyar, prăk hrui wĭt lu hlăm thŭn 2045, kluôm ala dlăng klei kreh knhâo, kdrăp mrâo, mlih mrâo mbruă leh anăn bi mlih mrô jing boh kdrŭt phŭn.

Kơ bruă klam mơ̆ng jih bruă kđi čar hlăm wưng kơ anăp, Khua gĭt gai Đảng mtă, ba mdah Hdră mtrŭn hlăm klei hdĭp hŏng klei tŭ dưn leh anăn hmao; dŭm gưl, dŭm dhar bruă, alŭ wăl brei ngă bruă mtam, amâo dưi êmưt ôh. Khua gĭt gai Đảng mtă, mjêč bi leh klei bhiăn, hdră êlan hlăm thŭn 2025, knư̆ hnưm knư̆ jăk brei bi leh bruă mkra mlih, mbŏ amâodah mtrŭn hdră bhiăn mrâo, hdră êlan, ruh mgaih jih klei gun kpăk čiăng mđĭ kyar klei kreh knhâo, kdrăp mrâo mbruă leh anăn mlih mrô, mtrŭt klei jhŏng mĭn, jhŏng ngă, jhŏng đua klam.