Knăm kkuh hla čhiăm gru ti plao ksĭ Hòn Khoai, kdriêk Ngọc Hiển, čar Cà Mau, kbưi hŏng lăn hang hlăm brô 14km. Tinei jing anôk tal êlâo mơ̆ng Êa ksĭ Ngŏ nao phă krĭng ksĭ Yŭ kwar Dhŭng, anôk dưi dlăng msĕ si krĭng phŭn hlăm bruă răng mgang wăl adiê, êa ksĭ lehanăn krĭng lăn Yŭ Dhŭng mơ̆ng Ala čar. Dưi dlăng hla čhiăm gru đung hlăm angĭn krah êa ksĭ, mmuñ kwang klei mmuñ Ala čar ngă kơ lu mnuih mgei ai tiê hlăk tal êlâo dưi nao ti knăm kkuh hla čhiăm gru ti krah plao ksĭ.

Dưi dôk mbĭt hŏng phung kahan ti plao ksĭ, nao hlăm knăm kkuh hla čhiăm gru kâo ƀuh anei jing sa klei mơak prŏng êdi hŏng kâo pô.

Hŏng êbeh 150 plao ksĭ điêt prŏng hlăm krĭng ksĭ Yŭ Dhŭng, anôk mâo mnuih hdĭp mda, anôk knŏng mâo lĭng kahan. Mâo dŭm plao ksĭ, anôk ala dleh dôk, čư̆ boh tâo điêt prŏng, găn êrô dleh dlan. Ƀiădah hgao jih klei anăn, phung kahan mơ̆ng êpul rada truh kơ kahan răng mgang knông lăn… krơ̆ng kjăp kiê kngan, 24/7 krơ̆ng kjăp wăl adiê, krĭng ksĭ, tui ksiêm djăp hô̆ mran lehanăn mta kñăm čiăng pral hưn mthâo hŏng anôk bruă; jing anôk jưh knang hơĭt kjăp kơ mnuih hiu trah mă kan tơdah tăm ruă duam amâo dah ruă êka ti hô̆ mran êjai nao hiu mă kan. Đại úy Nguyễn Tuấn Anh, Khua anôk bruă ra đa 625 trung đoàn 551 Knơ̆ng gĭt gai kahan êa krĭng 5 brei thâo:

Anôk bruă pŏk ngă leh jăk bruă klam kdơ̆ng mblah, ksiêm dlăng, pral hmao ƀuh anôk kñăm hlăm krĭng wăl čiăng krơ̆ng kjăp dŭm hdră dôk gak răng, boh nik mprăp kdơ̆ng mblah, pral hưn mthâo klei mâo hlăm êa ksĭ truh ti Knơ̆ng bruă gĭt gai lehanăn đru mguôp kriê dlăng, răng mgang hơĭt kjăp krĭng êa ksĭ mâo kah mbha.

 Mâo klei mđing dlăng mơ̆ng Đảng, Knŭk kna, klei hgŭm kngan mơ̆ng mnuih ƀuôn sang, dŭm krĭng plao ksĭ Yŭ Dhŭng ară anei dôk bi mlih hlăm grăp hruê, anôk bruă êlan klông, mdrao mgŭn, brŏng êa kba, pui kmlă, sang hră gưl hđeh điêt truh kơ gưl 2 dưi rŭ mdơ̆ng kjăp, đru kơ mnuih ƀuôn sang mâo klei jăk găl hĭn hlăm klei hdĭp mda lehanăn mđĭ kyar bruă duh mkra. Mâo knŭk kna lehanăn knơ̆ng prăk brei čan prăk hŏng ênoh prăk mnga hdul, kyua anăn ară anei mbĭt hŏng bruă hiu mă kan lu mnuih ƀuôn sang jhŏng duh mkra ênao ñuăl rông kan mguôp hŏng hdră mđĭ kyar bruă hiu čhưn ênguê snăn klei hdĭp đĭ kyar hĭn leh.

Kâo ƀuh bruă rông mnơ̆ng hlăm êa mâo klei găl êdi. Tinei mâo klei găl jing amâo mâo angĭn êbŭ ktang ôh, êa doh mơh snăn dŭm mta mnơ̆ng rông đĭ jing pral, hnơ̆ng tŭ jăk kdlưn mơh. Thĭn 2024 mâo čhĭ 10 ton mnơ̆ng rông hlăm êa, mâo prăk mnga dŭm êklăk prăk mơh.

Ai êwa yan mnga msĕ si dôk truh hnưm ti dŭm krĭng plao ksĭ hŏng dŭm ênhiang mmuñ, hnư mnơ̆ng jiă knhuah krĭng kwar mâo êpul mă bruă mđup brei kơ phung lĭng kahan lehanăn mnuih ƀuôn sang ti olao ksĭ, lehanăn sa hdră bruă amâo dưi kƀah jing đŭng ƀêñ điŏ Têt ti plao ksĭ. Ƀêñ điŏ tinei ăt mâo điŏ, êtak mtah, čĭm ŭn ƀiădah dưi đŭng hŏng hla mtei, bi rup jar mkra ƀêñ mâo mkra mơ̆ng hla đung.

Mơ̆ng gưl hiu čhưn tal anei, grăp čô mnuih hlăm êpul lŏ thâo săng hĭn kơ klei hdĭp, hdră duh mkra, klei găl hriăm hră, mjĕ mjuk, mă bruă lehanăn ai êwa mprăp yan mnga, drông Têt mơ̆ng phung knuă druh, lĭng kahan lehanăn mnuih ƀuôn sang ti krĭng ksĭ Yŭ Dhŭng, thâo săng hĭn kơ klei đru mguôp, săn asei hŏng klei ñăt kriêp mơ̆ng phung kahan êa ksĭ, klei gĭr mơ̆ng mnuih ƀuôn sang krĭng plao ksĭ anăp angĭn ktang, êa puh yă, đru krơ̆ng kjăp klei găl kiă kriê kluôm ênŭm krĭng êa ksĭ, plao ksĭ, đru mđĭ kyar bruă duh mkra hgŭm kngan mkŏ mkra dŭm plao ksĭ anei jing krĭng lăn mtah mda mơ̆ng Ala čar./.