Khua lăn čar mñă klă Đảng leh anăn knŭk kna Việt Nam dlăng yuôm bhăn leh anăn hmăng hmưi mđĭ hĭn klei bi mguôp hŏng Mongol hlăm dŭm mta bruă, bi mguôp hŏng ai dưi leh anăn klei čiăng mơ̆ng dua tĭng, djăp ênŭm boh tŭ dưn leh anăn klei hmăng hmưi mơ̆ng mnuih ƀuôn sang grăp lăn čar, đru hlăm bruă rơ̆ng kjăp klei êđăp ênang, hơĭt kjăp, bi mguôp leh anăn mđĭ kyar alŭ wăl leh anăn tar rŏng lăn. Khua lăn čar mñă klă klei mĭn sa anăn mơ̆ng Việt Nam hmăng hmưi bi êlam hĭn klei bi hgŭm, klei đĭ kyar klă klơ̆ng leh anăn kluôm dhuôm plah wah dua lăn čar.

Dua tĭng čiăng hnưm hluê ngă dŭm klei kuôl kă bi siñê hlăm gưl nao čuă mơ̆ng khua gĭt gai dua ala čar, ăt msĕ mơh mta phŭn klei kƀĭn mlir knŭk kna, boh nik hlăm dŭm mta bruă duh mkra, mnia mblei, duh bi liê, klei êđăp ênang, bruă lĭng kahan, sang hră mơar leh anăn klei mjĕ giăm plah wah dŭm alŭ wăl. Mbĭt hŏng anăn, dua tĭng lŏ dơ̆ng bi sa ai hlăm dŭm klei kƀĭn tar rŏng lăn găl guôp hŏng hdră bhiăn tar rŏng lăn leh anăn boh tŭ dưn mơ̆ng grăp lăn čar.