Tlam 27/1, Khua gĭt gai Đảng Tô Lâm gĭt gai mmông mă bruă hŏng Anôk dlăng bruă Đảng čar Quảng Ninh kơ dŭm hdră msir mđĭ kyar bruă duh mkra - ala ƀuôn, rơ̆ng êđăp ênang lĭng kahan. Hưn mdah hlăm mmông mă bruă brei ƀuh thŭn 2025, GRDP Quảng Ninh đĭ giăm 12%, lu hĭn kluôm ala; hnơ̆ng bruă duh mkra pŏk mlar, hnơ̆ng mnuih mă bruă đĭ êbeh 13%, hrui wĭt prăk knŭk kna mâo êbeh 85 êbâo êklai prăk, bi liê lŏ dơ̆ng êdah kdlưn.

Blŭ hrăm hlăm mmông mă bruă, Khua gĭt gai Đảng mtă kơ Quảng Ninh ksiêm dlăng êlam ai tiê Klei bi kƀĭn tal XIV mơ̆ng Đảng, pŏk ngă hrăm mbĭt hdră tă kluôm phŭn, mkŏ mjing hdră ngă bruă klă mngač, tŭ dưn, bi mklă djŏ  hdră êlan, klei găl leh anăn klei kñăm. Mbĭt anăn, brei alŭ wăl lŏ mkra mjing wawl đĭ kyar, bi mguôp êa ksĭ, plao ksĭ, knông lăn, mnơ̆ng kriê pioh leh anăn ƀuôn prŏng jing wăl hdĭp mda sa anăn čiăng mjing boh kdrŭt mđĭ kyar hơĭt kjăp, sui.