Khua gĭt gai Đảng sa blư̆ dơ̆ng bi mklă, hdră êlan hŏng phung mâo ai hŏng lăn čar; bruă tui duah klang phung êngiă asei leh anăn bi mklă anăn djuê klang phung êngiă asei jing bruă kđi čar yuôm bhăn, êlam kơ knhuah hdĭp, hƀuê ênuk leh anăn klei khăp kơ mnuih; jing hnơ̆ng mkă bruă klam mơ̆ng Đảng, knŭk kna hŏng phung săn leh asei kyua klei êngiê mơ̆ng čar kwar.

Khua gĭt gai Đảng mtă kơ bruă Đảng knŭk kna gĭt gai mjêč bruă ksiêm dlăng, mkra mlih, mbŏ hdră êlan, hdră bhiăn kơ phung mâo ai hŏng lăn čar, boh nik dŭ, hdră kčah dôk gun kpăk hlăm bruă tŭ yap phung êngiă asei hŏng phung êka êkeh djiê kyua anôk êka lŏ ruă; tŭ yap phung săn asei tơdah ngă bruă klam hgăm; hră mơar amâo lŏ djŏ guôp hŏng boh sĭt, sui, bi leh msir mgaih hră mơar adôk kpăk đuôm kơ hdră êlan phung mâo ai hŏng lăn čar hlăm thŭn 2026.