Tlam hruê  24-9 ti Hà Nội, Khua gĭt gai Đảng Tô Lâm, Khua bruă Đảng Kahan gưl dlông nao lehanăn blŭ hrăm ti Klei bi kƀĭn bi lông ktưn kluôm anôk bruă kahan tal XI wưng thŭn 2020 – 2025. Khua gĭt gai Đảng Tô Lâm hơêč hmưi kơ dŭm boh tŭ êdah êdi mơ̆ng dŭm êpul, mnuih lehanăn êpul êya dưi mâo hlăm hdră anei wưng êgao, mbĭt anăn lač brei lar bra hdră anei amâo djŏ knŏng hluê ngă hlăm anôk bruă lĭng kahan ƀiădah brei mtrŭt mđĭ hdră hluê ngă hlăm dŭm phŭn, dhar bruă, alŭ wăl, anôk bruă duh mkra lehanăn êpul êya, đru mjing knhuah jăk hlăm klei bi lông ktưn khăp kơ ala čar hlăm kluôm ala čar kơ bruă mkŏ mkra lehanăn răng mgang Ala čar.

Čiăng mđĭ lar dŭm boh tŭ dưn dưi mâo, Khua gĭt gai Đảng Tô Lâm hưn mdah klă klei dôk mâo ti krĭng knông lăn, hlăm wưng ti anăp srăng mâo dleh dưi ksiêm dlăng, hdră mblah hluê êlan ba yua kdrăp mrâo đĭ, kyua anăn brei mđĭ hĭn hdră mkŏ mkra – răng mgang ala čar hlăm boh klei mrâo, dôk čiăng kơ êpul lĭng kahan drei mđĭ klei hriăm mjuăt, knhâo, knhăk, mrâo mrang, pral kdal, raih kơ kdrăp mrô. Hlăm boh klei anei, klei bi lông khăp kơ ala čar dưi bi êdah snei: Lĭng kahan kdơ̆ng mblah tui ksiêm lehanăn mjuăt bi hriăm kơ klei dôk mâo sĭt, djŏ mnuih, djŏ alŭ wăl, thâo kơ phao ktuang, boh nik phao ktuang ênuk mrâo; brei rơ̆ng kjăp klei êđăp ênang jing mta phŭn. Ƀri gưl anei, phung khua Phŭn bruă lĭng kahan mđup brei leh Hla čhiăm gru bi lông ktưn kơ 84 êpul êya, mđup brei Hră pah mni kơ dŭm êpul lehanăn mnuih mâo boh tŭ êdah êdi hlăm Hdră bi lông ktưn khăp kơ ala čar hlăm êpul kahan tal 11./.