Ti anôk drông, Khua gĭt gai Tô Lâm lač Đảng lehanăn knŭk kna Việt Nam êlâo êdi ăt msĕ, mâo klei bi hgŭm tal êlâo hĭn amâomâo dưi mlih ôh plah wah Việt Nam - Lào, sa ai hŏng klei mlih mrâo lehanăn ñŭ kma hŏng ala tač êngao mơ̆ng Lào, srăng đru jih hnơ̆ng kơ Đảng, Knŭk kna lehanăn mnuih ƀuôn sang Lào, bi đru hlăm klei lông dlăng ti anăp klei dleh dlan, lehanăn mâo klei hơêč hmưi kơ Êpul mâo hriê čhưn mă bruă bi tŭ jing.

Khua gĭt gai mñă, čhuang hlăm ênuk gưl mrâo, dua nah hlue ngă kjăp hĭn, tŭ jing hĭn klei leh bi tŭ ư, mâo kuôl kă leh. Khua gĭt gai Tô Lâm đăo knang, hŏng atur kjăp, lehanăn klei kut kat prŏng hlăm bruă kđi čar, klei bi mguôp Hà Nội - Viêng Chăn srăng lŏ mâo klei đĭ kyar prŏng, đru mguôp hlăm klei mđĭ kyar mơ̆ng mdê bi alŭ wăl, lehanăn mtrŭn agha êlam hĭn klei bi hgŭm prŏng, klei thâo bi mguôp kjăp plah wah  Việt Nam - Lào.