Hlăm klei kƀĭn, Êpul gơ̆ng ngă klei ksiêm wĭt dŭm bruă klam, bruă mprăp kơ klei kƀĭn kluôm bi lông ktưn khăp kơ lăn čar kluôm ala gưl 11 mkŏ mjing hlăm hruê 26 - 27/12, mbĭt anăn ksiêm dlăng kơ hdră êlan mđup brei anăn knăl “Pô jhŏng ktang lĭng kahan yang ƀuôn”, “Pô jhŏng ktang mă bruă” kơ êpul êya, grăp čô. Klei kƀĭn kluôm bi lông ktưn khăp kơ lăn čar kluôm ala jing bruă kđi čar yuôm bhăn mơ̆ng lăn čar, lŏ ksiêm wĭt klei bi lông ktưn 5 thŭn êgao, sa wưng păn bruă yuôm bhăn êdi, lu boh klei ta tuôm mâo.

Klei kƀĭn lŏ jing anôk bi kƀĭn, bi lar ai tiê khăp kơ lăn čar, klei mĭn kpưn đĭ, klei hmăng hmưi duh myơr mơ̆ng jih djuê ana, pŏk sa wưng bi lông ktưn mrâo, ba lăn čar đĭ kyar mdrŏng ktang, yâo mơak. Blŭ hrăm bi klă hlăm klei kƀĭn, Khua Knŭk kna Phạm Minh Chính bi mni kơ dŭm êpul bruă mâo klei gĭr hluê ngă jăk dŭm bruă klam mprăp kơ klei kƀĭn trông bi lông ktưn khăp kơ lăn čar. Khua Knŭk kna Phạm Minh Chính mñă brei ngă mtam bruă hưn mdah dŭm boh tŭ dưn bruă duh mkra - ala ƀuôn Việt Nam leh 80 thŭn mlih mrâo, klei rang mdah rup hŏng akŏ “Bi lông ktưn khăp kơ lăn čar - kyua sa Việt Nam mdrŏng ktang”. Mbĭt hŏng anăn, mkŏ mjing klei hưn kơ klei kƀĭn kluôm bi râo ktang phŭn ai tiê khăp kơ lăn čar, bi lar kluôm hdră bruă bi lông ktưn hlăm yang ƀuôn, mkŏ mjing boh kdrŭt, lŏ čuê kơ klei mđĭ kyar lăn čar hlăm dŭm thŭn kơ anăp./.