Tlam mbrue 22-9, ti Anôk bruă knŭk kna, Khua knŭk kna Phạm Minh Chính kiă kriê klei bi kƀĭn tal sa, êpul khua kiă kriê gưl dlông klei kơ sang lăn. Khua knŭk kna mtă brei ngă bi mngač mâo amâodah hơăi klei duah mđĭ soh hŏng klei bhiăn ênoh ênil klei kơ sang lăn, lehanăn brei wĭt lač, ya ngă klei ênoh ênil sang lăn đĭ yuôm nanao…Tui si klei hâo mdah ti anôk bi kƀĭn, hlăm 9 mlan êgao, kluôm ala mâo leh 1êbâo 816 anôk rŭ mdơ̆ng klei kơ sang dôk, alŭ wăl ƀuôn prŏng mrâo. Klei bi mnia mblei sang lăn hlăm wưng giăm anei hlăk ti hnơ̆ng 430 êbâo klei bi mnia mblei, ênoh sang dôk ară anei yuôm snăk sơưn.

Ti anôk bi kƀĭn, khua knŭk kna Phạm Minh Chính lač, bruă klam klei kơ sang lăn jing bruă yuôm bhăn, đru mguôp kơ klei mđĭ kyar, mjing klei hdĭp hơĭt kơ mnuih ƀuôn sang, mjing ƀô̆ ala mrâo kơ lăn čar. Khua knŭk kna mtă, klei kơ sang lăn brei mnuih ƀuôn sang tloh blei, tloh mưn, bi hơĭt klei hdĭp mda. Khua knŭk kna mñă, brei ngă hŏng ai tiê “Jih jang bruă kyua mnuih ƀuôn sang, kyua lăn čar, brei mâo klei gĭr prŏng, mă bruă hŏng jih ai tiê, mbha bruă klă mngač, klă mnuih, klă bruă, klă hrue mmông, klă klei dưi, klă bruă klam klă mngač mnơ̆ng mnuă pioh kơ klei bi mlih, mđĭ kyar pral klei kơ sang dôk, lehanăn klei bi mnia mblei lăn ala./.