Tlam 25/3, Khua knŭk kna Phạm Minh Chính gĭt gai Klei bi kƀĭn knŭk kna, hmư̆ Phŭn bruă sang hră mtô bi hriăm leh anăn Phŭn bruă mdrao mgŭn hưn kơ dŭm hră čih hdră bruă yuôm bhăn hŏng Phŭn bruă kđi čar. Khua knŭk kna Phạm Minh Chính mtă brei mtô klei Ăngle hlăm hdră mtô bi hriăm hđeh sang hră gưl sa leh anăn gưl 2,3.  Hdră mtrŭn mơ̆ng Phŭn bruă sang hră leh anăn mtô bi hriăm brei dưm klei kñăm mđĭ hnơ̆ng jăk bruă sang hră, mtô bi hriăm; mkŏ mjing, mđĭ kyar kluôm anak mnuih Việt Nam mâo knuih hdĭp jăk, klei thâo, dhar kreh, klei suaih pral; mđĭ klei thâo klei blŭ ala tač êngao, boh nik klei Ăngle hlăm sang hră.

  Khua knŭk kna Phạm Minh Chính mtă kơ Phŭn bruă sang hră leh anăn mtô bi hriăm lŏ dơ̆ng mă klei blŭ mguôp hlăm klei bi kƀĭn, bi leh klei kčĕ mâo Hdră kñăm ala čar kơ klei bi mrâo mrang, mđĭ hnơ̆ng jăk bruă mtô bi hriăm. Hdră kčah klei kñăm brei grăp knhuang mtô klei Ăngle hlăm hdră mtô gưl sa leh anăn gưl 2,3. Mtô anak mnuih snăn brei kƀĭn hlăm knuih hdĭp, klei thâo, klei jăk siam. Mbĭt anăn mđing kơ phung hđeh ti krĭng taih kbưi, knông lăn, plao ksĭ.