Hlue si klei hưn mdah ti anôk bi kƀĭn, hlăm gưl yan adiê ngă mrâo êgao, ênoh sang dlưh rai, klưh brei lŏ mkra mrâo jing 1.597 boh sang, truh ară anei bi leh 671 boh sang, ênoh adôk  dôk rŭ mdơ̆ng. Ênoh sang jhat rai giăm 34.800 boh sang, ară anei bi leh bruă mkra mđĭ. Khua gĭt gai čar Dak Lak brei thâo hlăm wưng kơ anăp srăng lŏ ksiêm dlăng, mdơ̆ng sang mdrơ̆ng hŏng êa lip. Čar Gia Lai dôk kƀĭn mkŏ mjing 38 wăl anôk dôk mrâo kơ mnuih ƀuôn sang, gĭr mbĕ đuê̆ mnuih ƀuôn sang hlăm krĭng hmăi djŏ nao ti anôk dôk mrâo.

Phŭn bruă lĭng kahan ba nao 176.000 gưl knuă druh, lĭng kahan, kahan ƀuôn hŏng dŭm êbâo gưl êdeh êdâo dŭm mta bi hgŭm hŏng bruă sang čư̆ êa alŭ wăl đru kơ mnuih ƀuôn sang mdơ̆ng sang. Phŭn bruă kahan ksiêm ba nao êbeh 11 êbâo gưl knuă druh, lĭng kahan đru kơ mnuih ƀuôn sang msir boh jhat yan adiê ngă. Ti anôk bi kƀĭn, Khua knŭk kna Phạm Minh Chính bi êdah klei mơak tơdah “Hdră êlan Quang Trung” leh 1 mlan pŏk ngă bi leh jih jang sang mkra mđĭ, djŏ hŏng hdră kčah. Khua knŭk kna mtă brei bi hrŏ wưng, gĭr truh hruê 15/01/2026 bi leh bruă lŏ mdơ̆ng sang dlưh, rai čiăng kơ mnuih ƀuôn sang mâo sang dôk êlâo kơ Klei bi kƀĭn phung bi ala kluôm ala tal XIV mơ̆ng Đảng.