Hlăm klei bi tuôm, Khua knŭk kna bi mni kơ ƀuôn prŏng Cần Thơ leh anăn dŭm phŭn, dhar bruă pŏk ngă leh kjăp klei gĭt gai mơ̆ng Khua knŭk kna sui hŏng anei êbeh 2 mlan (hlăk Khua knŭk kna nao bi tuôm hŏng phung bi aka kơ mnuih ƀuôn sang Cần Thơ êlâo kơ klei bi kƀĭn tal 10, Bruă kƀĭn ala gưl XV) kơ bruă bi leh hră mơar djŏ tuôm kơ Hdră bruă bi liê mkŏ mjing Sang êa drao Ung bướu Cần Thơ mrâo, mơ̆ng ênoh prăk brei čan ODA jing ba yua ênoh prăk bi liê knŭk kna; mbĭt anăn bi leh hră mơar blei 2 boh masin mdrao klei ruă brŭ kơ Sang êa drao anei ară anei.

Mñă klă hlăm wưng kơ anăp kƀĭn bi leh klei bhiăn, bi mlih klei bhiăn mơ̆ng klei kpăk đuôm jing klei găl, klei bi ktưn ala čar čiăng iêô jak klei găl hlăm ala čar leh anăn ala tač êngao, Khua knŭk kna lač, jih bruă kđi čar ƀuôn prŏng, mnuih ƀuôn sang, anôk bruă duh mkra hgŭm, mjing ai ktang kluôm kyua “Klei găl mphŭn mơ̆ng klei mĭn leh anăn hnơ̆ng trah dlăng, boh kdrŭt mphŭn mơ̆ng klei mlih mrâo leh anăn mbruă, ai ktang mphŭn mơ̆ng mnuih buôn sang leh anăn anôk bruă duh mkra”.