Čiăng mtrŭt mđĭ klei mjĕ giăm bi hgŭm plah wah Việt Nam leh anăn OECD ƀrư̆ hruê ƀrư̆ klă klơ̆ng, tŭ dưn hĭn, Khua knŭk kna brei thâo Việt Nam hmăng hmưi ksiêm duah nao hgŭm  hlăm OECD leh anăn mñă kơ khua kiă kriê gĭt gai dŭm Êpul thơ̆ng kơ bruă mơ̆ng OECD kah mbha klei hriăm, đru kčĕ hdră êlan leh anăn đru kơ Việt Nam mđĭ ai dưi bi ktưn, mđing truh kơ bruă mâo djăp ênŭm hnơ̆ng čuăn kriê dlăng tar rŏng lăn mơ̆ng OECD, đru kơ Việt Nam bi kluôm leh anăn hưn mdah dŭm klei hưn bruă duh mkra yuôm bhăn čiăng mjing tur knơ̆ng kơ bruă čuăl mkă dŭm hdră êlan mđĭ kyar wưng sui mơ̆ng Việt Nam.

Khua knŭk kna mñă kơ OECD sa ai, đru kơ Việt Nam mâo djăp dŭm hnơ̆ng čuăn, mđing truh kơ bruă mŭt hlăm OECD, hluê anăn lŏ dơ̆ng ñŭ kma êlam hĭn hlăm bruă duh mkra tar rŏng lăn leh anăn đru mguôp lu hĭn kơ êpul êya tar rŏng lăn, kyua klei êđăp ênang, bi mguôp, mđĭ kyar tar rŏng lăn.