Mmăt mbruê (7/10), ti Anôk bruă knŭk kna, Khua knŭk kna Phạm Minh Chính gĭt gai Klei bi kƀĭn tal 16 Anôk bruă gĭt gai ala čar kơ klei mă kan hdang soh hŏng hdră bhiăn, amâo hưn mdah leh anăn amâo hlue si klei kčah mtrŭn (IUU). Klei bi kƀĭn dưi mkŏ hŏng 21 čar, ƀuôn prŏng hang ksĭ.

Khua knŭk kna Phạm Minh Chính bi mni kơ ai tiê mă bruă jăk mơ̆ng dŭm phŭn, dhar bruă, alŭ wăl hlăm klei mđĭ, lăm lui hră kñĭ IUU. Mơ̆ng êlâo truh ară anei, klei ksiêm dlăng wĭt mrô kŭm păn dưi mkăp brei hrŏ; kŭm păn trah mă kan amâo djăp klei dưi ngă bruă hrŏ; kŭm păn dưm kdrăp ksiêm dlăng video thâo mĭn đĭ; ka ƀuh thiăm ôh kŭm păn luč klei mkŏ, găn soh kdriêl bi knông hlăm êa ksĭ; ka mâo ôh klei bi mklă mâo thiăm kŭm păn ngă soh hlăm krĭng êa ksĭ ala tač êngao arăng mă kơ̆ng, msir mgaih… Mñă klă ai tiê brei jih ai tiê ngă bruă hŏng klei suah mă hlue si IUU, dŭm klei mplư, dêč kơ jia…; Khua knŭk kna lač tơdah čiăng mkhư̆ kjăp, Phŭn bruă lŏ hma leh anăn wăl hdĭp mda hŏng dŭm alŭ wăl kčĕ, akâo kơ Knŭk kna čiăng msir mgaih jih klei anei.