Klei kƀĭn trông gưl dlông BRICS 2025 mphŭn pŏk aguah mbruê 6/7, hluê mmông blŭ wăl ti ƀuôn prŏng Rio de Janeiro, Brazil.

Anei jing gưl tal êlâo Việt Nam nao hgŭm hŏng bruă klam jing ala čar hgŭm hlăm Klei kƀĭn trông gưl dlông BRICS, sa hdră êlan bi mguôp lu tĭng plah wah dŭm anôk bruă duh mkra mrâo đĭ leh anăn ƀrư̆ hruê ƀrư̆ mâo klei hmăi kơ bruă duh mkra leh anăn bruă kđi čar.

Klei kƀĭn trông gưl dlông BRICS 2025 mâo akŏ “mđĭ hĭn klei bi mguôp Êgar Dhŭng čiăng mtrŭt mđĭ klei kluôm dhuôm leh anăn hơĭt kjăp hĭn”, jing sa hlăm dŭm hdră bruă lu tĭng yuôm bhăn, mâo klei nao hgŭm mơ̆ng hlăm brô 20 čô khua gĭt gai gưl dlông dŭm ala čar, khua gĭt gai Êpul hgŭm lu ala čar leh anăn khua kiă kriê lu êpul bruă dlông rŏng lăn. Khua knŭk kna Phạm Minh Chính nao hgŭm leh anăn blŭ hrăm hlăm gưl bi trông gưl dlông hŏng akŏ: Mđĭ hĭn hdră êlan lu tĭng, dŭm boh klei bruă duh mkra, ngăn prăk leh anăn klei thâo mĭn mơ̆ng anak mnuih, wăl hdĭp mda, COP 30 leh anăn bruă mdrao mgŭn tar rŏng lăn, leh anăn nao hgŭm ba mdah klei bi klă mbĭt mơ̆ng khua khua gĭt gai kơ ngăn prăk bruă yan adiê, mkŏ wĭt ƀĭng hgŭm BRICS leh anăn lăm lui klei ruă tưp hlăm yang ƀuôn. Hlăm dua hruê mkŏ mjing klei kƀĭn trông, dŭm ala čar hgŭm mơ̆ng BRICS kñăm kơ klei bi mguôp hlăm dŭm mta bruă msĕ si bruă mdrao mgŭn, klei thâo mĭn mơ̆ng anak mnuih leh anăn klei bi mlih yan adiê.