Blŭ hrăm hlăm mmông bi trông, Khua knŭk kna Phạm Minh Chính iêo mthưr dŭm ala čar čiăng mâo klei gĭr hĭn, ai dưi ktang hĭn, ngă bruă ktang phĭt hĭn kơ dŭm hdră êlan. Kyuadah lăm lui klei ư̆ êpa ƀun ƀin amâo djŏ knŏng mâo boh tŭ dưn yuôm bhăn, ƀiădah lŏ jing tur knơ̆ng yuôm bhăn hĭn, hmăi klă sĭt kơ klei êđăp ênang, hơĭt kjăp tar rŏng lăn. Ƀri wưng anei, Khua knŭk kna Phạm Minh Chính ăt bi êdah dŭm boh tŭ dưn mơ̆ng Việt Nam msĕ si mkŏ mjing tŭ jing bruă hlăm bruă lăm lui klei ư̆ êpa, bi hrŏ klei ƀun ƀin.

Mơ̆ng sa ala čar ƀun ƀin, tŭ klei bi rai mơ̆ng giăm 40 thŭn bi blah, 30 thŭn kwang dar, hŏng hdră êlan mlih mrâo, Việt Nam dưi bi hrŏ ƀun lu tĭng, nao mbĭt hŏng bruă mgaih msir klei kƀah hlăm bruă mdrao mgŭn, sang hră mơar, sang dôk, êa doh, wăl hdĭp mda. Kyuanăn Việt Nam truh hnưm 10 thŭn hlăm bruă hluê ngă dŭm mta kñăm mđĭ kyar ênuk gưl mơ̆ng Êpul hgŭm lu ala čar.