Hlăm mmông mă bruă, Khua phŭn bruă rŭ mdơ̆ng Trần Hồng Minh bi tŭ ư hŏng čar kơ klei mkra mlih bi liê hdră bruă êlan dơ̆ng êran pral Nha Trang- Liên Khương truh wưng 2026-2030; jao kơ pô kriê dlăng hdră bruă kơ čar Khánh Hoà. Hŏng êlan dơ̆ng êran pral Dưr - Dhŭng nah Yŭ, kdrêč Plei Ku - Ƀuôn Ama Thuôt - Gia Nghĩa, jao kơ čar Dak Lak jing anôk bruă kriê dlăng. Hŏng bruă bi liê mkra mđĭ êlan dơ̆ng ala čar mrô 27, ba hdră bruă bi liê knŭk kna mơ̆ng čar leh anăn kčĕ hdră bruă knŭk kna đru mơ̆ng Gưl dlông.

Čiăng mđĭ klei dưi mkŏ mjing klei êdah kdlưn mđĭ kyar bruă duh mkra - ala ƀuôn čar Lâm Đồng, Khua phŭn bruă rŭ mdơ̆ng Trần Hồng Minh mtă mđĭ hnơ̆ng hlue ngă êlan dơ̆ng êran pral phŭn, msĕ si: Bảo Lộc - Liên Khương; Tân Phú (čar Đồng Nai) - Bảo Lộc (čar Lâm Đồng); êlan dơ̆ng êran pral Dưr- Dhŭng nah Yŭ, kdrêč Gia Nghĩa - Chơn Thành; mđing bi liê mđĭ 3 kdrŭn kdĭ ara anei ti čar. Kơ êlan phiơr, hŏng hdră bruă mkra mđĭ êlan phiơr Liên Khương mâo ênoh bi liê êbeh 1.000 êklai prăk mơ̆ng mlan 3 truh mlan 9 kơ anăp leh anăn tač êdeh phiơr Phan Thiết.