Tlam (19/8), K’iăng Khua bruă kƀĭn ala Vũ Hồng Thanh hŏng  Êpul bi ala Knơ̆ng bruă duh mkra leh anăn Ngăn prăk Bruă kƀĭn ala ksiêm dlăng dŭm hdră bruă yuôm bhăn ala čar leh anăn bruă duh mkra - ala ƀuôn čar Lâm Đồng. Hlue si klei hưn mdah mơ̆ng Knơ̆ng bruă sang čư̆ êa čar Lâm Đồng, ti čar mâo êlan dơ̆ng êran pral Dưr - Dhŭng nah Yŭ, kdrêč Gia Nghĩa - Chơn Thành, taih êbeh 124km, ênoh bi liê êbeh 25.500 êklai prăk, mâo Bruă kƀĭn ala bi mklă hdră êlan bi liê mơ̆ng knhal jih mlan 6/2024, ƀiădah dôk mâo pŏk ngă êmưt.

Êlan dơ̆ng ala čar mrô 27C taih êbeh 119 km mkŏ čar Lâm Đồng hŏng čar Khánh Hòa, mâo kčŭn čư̆ Khánh Lê dlông êbeh 30km, jing anôk kpăk đuôm hlăm klei mđĭ kyar hiu čhưn ênguê, dŭ mdiăng mnơ̆ng dhơ̆ng alŭ wăl. Leh kƀĭn bi mklă klei gun kpăk, čih yap hdră msir găn klei dleh dlan čar Lâm Đồng, phung ktuê dlăng mơ̆ng Dhar bruă duh mkra leh anăn Ngăn prăk Bruă kƀĭn ala bi mni kơ ai tiê pral, jih ai tiê hlăm bruă gĭt gai; lač klă kơ klei kƀah brei kƀĭn msir mgaih. K’iăng Khua bruă kƀĭn ala Vũ Hồng Thanh mtă kơ čar Lâm Đồng mđĭ hnơ̆ng dŭm hdră bruă phŭn; bi hgŭm hŏng phung bi liê kluôm msir mgaih bi jăk klei dleh dlan gun kpăk mjing klei đĭ kyar mơ̆ng hdră bruă mă mnơ̆ng hlăm gŭ lăn.