K’iăng Khua knŭk kna Trần Hồng Hà  mtă kơ ƀuôn prŏng Hải Phòng mđĭ lar klei gak răng, hâo hưn nanao kơ êlan angĭn êbŭ tuh hriê, amâo ngă ngơi mang. Ñu mñă klă, wăt tơdah ƀuôn prŏng Hải Phòng mâo leh hdră mdrơ̆ng hŏng angĭn êbŭ; khădah snăn, ăt brei mprăp kơ boh klei mjêč msĕ si luč pui kmlă, êa đĭ, pral mâo hdră bi blŭ hrăm, bi trông plah wah dŭm anôk bruă čiăng msir mgaih klei mâo.

Hlue si Anôk bruă kriê dlăng guê gang êa, Phŭn bruă lŏ hma leh anăn Mđĭ kyar krĭng ƀuôn sang, mdrơ̆ng hŏng angĭn êbŭ mrô 3, yap truh tlam 6/9, dŭm čar, ƀuôn prŏng mâo: Quảng Ninh, Hải Phòng, Thái Bình, Nam Định, Ninh Bình mbĕ đuĕ leh 37 êbâo 188 čô mnuih hlăm anôk kriê dlăng kan hdang, hlăm dŭm pưk sang krĭng ktuê hang ksĭ, krĭng tlung, huĭ hyưt nao ti anôk êđăp ênang. Êpul răng mgang hlăm êa ksĭ nao ksiêm yap, ktrâo lač kơ êbeh 51 êbâo mran, kŭm păn hŏng 220 čô mnuih thâo klei hâo hưn kơ angĭn êbŭ mrô 3 čiăng pral nao ti anôk êđăp ênang. Dŭm čar, ƀuôn prŏng mơ̆ng Quảng Ninh truh Nghệ An leh anăn Quảng Bình ngă leh asăp kăm nao hlăm êa ksĭ mơ̆ng hruê 6/9.