Mkŏ mjing truh hruê 25/1, Klei kƀĭn kluôm mâo akŏ: “Ti gŭ hla čhiăm gru hing ang mơ̆ng Đảng, hrăm mbĭt, sa ai ngă tŭ dưn dŭm mta kñăm mđĭ kyar lăn čar truh thŭn 2030, čŏng pô hdră êlan, đĭ kyar hlăm ênuk kpưn đĭ mơ̆ng djuê ana, kyua klei êđăp ênang, êngiê, ngă phŭn, mdrŏng ktang, mrâo mrang, yâo mơak, hơĭt kjăp truh kơ yang ƀuôn ngă phŭn”.

Klei kƀĭn prŏng kluôm ala tal 14 srăng bi trông, bi klă dŭm hră mơar yuôm bhăn: Klei hưn mdah kđi čar mơ̆ng Êpul khua bruă Đảng gưl dlông gưl 13, klei hưn mdah ksiêm wĭt đa đa boh klei hlăk mblang leh anăn boh sĭt klei mlih mrâo hluê si hdră tă yang ƀuôn ngă phŭn hlăm 40 thŭn êgao ti Việt Nam, Klei hưn mdah ksiêm wĭt 15 thŭn ngă hdră bhiăn Đảng leh anăn bi êdah, tă êlan bi mbŏ, mkra mlih hdră bhiăn Đảng, Klei hưn mdah ksiêm wĭt klei gĭt gai mơ̆ng Êpul khua bruă Đảng gưl dlông gưl 13.

Hră mơar klei kƀĭn kluôm 14 mâo klei bi tŭ ư kluôm plah wah klei mĭn Đảng leh anăn ai tiê mnuih ƀuôn sang, êjai mâo êbeh 14 êklăk klei blŭ mguôp mơ̆ng phung knuă druh, đảng viên, phung hriăm lu, phung thơ̆ng kơ bruă leh anăn dŭm gưl mnuih ƀuôn sang hlăm leh anăn êngao lăn čar.

Klei kƀĭn prŏng kluôm ala tal 14  mơ̆ng Đảng jing gru kruăk klei đăo knang leh anăn klei hmăng hmưi, ai dưi mơ̆ng djuê ana leh anăn klei sa ai mơ̆ng mnuih ƀuôn sang, ba lăn čar čhuang mŭt hlăm ênuk mrâo: êđăp ênang, êngiê, ngă phŭn mil pô, mdrŏng ktang, mrâo mrang, hơĭt kjăp.