Blŭ hrăm ti anôk bi kƀĭn,  Trần Cẩm Tú khua êpul kiă kriê bruă Đảng lač, ai tiê, bruă klam mơ̆ng phung ngă bruă klei mrâo hlăm ala čar lehanăn ala tač êngao kơ bruă hâo hưn klei bi kƀĭn prŏng Đảng 14. Mbĭt anăn brei thâo, Klei bi kƀĭn prŏng 14 srăng mkŏ mjing ti Hà Nội mơ̆ng hrue 19 - 25/1/2026, mâo truh 1.586 čô pô bi ala kơ êbeh 5,6 êklăk čô đảng viên Đảng Cộng sản Việt Nam, hŏng hdră êlan “Bi mguôp – hnŭk êngiê – Klei bhiăn kjăp – hđuh – mđĭ kyar”.

Boh nik hlăm klei bi kƀĭn prŏng anei jing klei mlih mrâo hlăm bruă mkŏ mjing hră mơar klei bi kƀĭn. Gưl tal êlâo, mâo 3 klei hâo mdah (Klei hâo mdah bruă kđĭ čar, Klei hâo mdah bruă duh mkra ala ƀuôn lehanăn klei hâo mdah bruă mkŏ mjing Đảng) bi klin jih jang jing klei hâo mdah bruă kđi čar. Amâo mâo djŏ knŏng bi mklă mta kñăm, bruă čuăn, hdră mơar klei bi kƀĭn lŏ mâo dŭm hdră êlan mă bruă klă mngač. Klei anei brei ƀuh, kut kat ba hdră mtrŭn nao hlăm klei hdĭp leh klei bi kƀĭn prŏng, mghaih msir bi jih klei êmưt hlue ngă. Bruă mă klei blŭ mnuih ƀuôn sang kơ bruă čih mkra hră mơar klei bi kƀĭn, mâo leh giăm 14 êklăk gưl klei blŭ bi mklă klei thâo bi mguôp plah wah klei mĭn Đảng hŏng ai tiê mnuih ƀuôn sang, bi knăl leh kơ klei sa ai prŏng hlăm yang ƀuôn hlăm dŭm hdră êlan mơ̆ng klei bi kƀĭn prŏng 14 čoh čuăn. Mbĭt hŏng anăn bruă mkŏ mjing, bruă răng mgang klei êđăp ênang lehanăn klei hâo hưn mâo ngă mơ̆ng hnưm, bi kjăp klei đăo knang mơ̆ng phung knhuă druh, đảng viên lehanăn mnuih ƀuôn sang hŏng klei bi kƀĭn prŏng, mjing klei sa hnơ̆ng hlăm Đảng lehanăn klei sa ai hlăm yang ƀuôn./.