Êlâo anăn, tlam mbrue (20/1), klei trông čhai hlăm êpul, mơ̆ng dŭm êpul phung bi ala mkŏ mjing leh kjăp, mâo klei đua klam, hŏng klei mĭn mbruă, lehanăn klă mngač. Jih jang klei blŭ mâo hlang mblang hŏng dŭm klei pioh mđĭ kyar lăn čar hlăm ênuk gưl mrâo, dơ̆ng mơ̆ng bruă bi leh klei bhiăn kiă kriê, bi mlih êpul khua kiă kriê, mđĭ hĭn klei dưi kiă kriê ala čar, mtrŭt mđĭ bruă bi mlih mrô, mđĭ kyar klei kreh knhâo, mlih mrâo hŏng klei knhêč, đrŭ kơ klei đĭ kyar mâo klei kjăp, mđrĭng hŏng klei mtăp mđơr hlăm yang ƀuôn.

Dŭm klei đru mguôp hlăm hră mơar klei bi kƀĭn lu phung bi ala mñă lŏ dơ̆ng klei mlih mrâo hlăm klei mĭn kiă kriê, gĭt gai hlue hdră mđĭ kyar, mă mnuih ƀuôn sang lehanăn phung duh mkra jing phŭn, lehanăn mghaih msir jih ya mta klei dôk gun kpăk kơ klei duh mkra. Jih jang klei blŭ mâo bi êdah ai tiê kjăp hŏng bruă kđi čar, mâo klei đua klam prŏng ti anăp Đảng, ti anăp mnuih ƀuôn sang, đru bi leh jih jang hră mơar ba mdah kơ klei bi kƀĭn prŏng, bi djŏ hŏng klei mđĭ kyar lăn čar hlăm ênuk gưl mrâo./.

 Mta phŭn Klei bi kbĭn tal XIV mơ̆ng Đảng mñă: Ti gŭ hla čhiăm gru kdrưh kơăm mơ̆ng Đảng, klei sa ai hluê ngă tŭ jing mta kñăm mđĭ kyar ala car truh tŭn 2030; čŏng kpưn đĭ hlăm ênuk gưl mrâo mơ̆ng djuê ana…”. Anei jing gưl tal êlâo Klei bi kƀĭn mñă klă klei gĭr čŏng kpưn đĭ mơ̆ng djuê anăn, hưn klă ai tiê ñŭ kma ƀiădah ăt rơ̆ng kjăp knhuah dhar kreh lehanăn klah hjăn. Mbĭt anăn, hdră êlan “Hgŭm mguôp – Ngă phŭn mil pô – Kjăp ktang – Boh kdrŭt – Đĭ kyar” lŏ thiăm leh “Boh kdrŭt”. Klei anei bi êdah klei gĭr amâo djŏ knŏng rơ̆ng klei hơĭt kjăp ƀiădah mjing boh kdrŭt ktang hĭn. Hluê Thạc sĩ Hà Trung Thành – Nai mtô Adŭ ksiêm hriăm bruă Mkŏ mkra Đảng, Sang hră ksiêm hriăm kơ phung knuă druh ƀuôn prŏng Hồ Chí Minh brei thâo, Klei hưn mdah bruă kđi čar mơ̆ng Anôk dlăng bruă Gưl dlông amâo djŏ knŏng mñă hnơ̆ng trah dlăng truh thŭn 2030 ƀiădah lŏ jing asăp mtrŭn brei ngă bruă.

“Klei blŭ hrăm bi êdah ai tiê mlih mrâo, mñă klei čiăng bi mlih ktang phĭn, lač sĭt, ngă sĭt, boh tŭ dưn dĭt amâo djŏ knŏng hlăm bruă duh mkra ƀiădah wăt hlăm bruă kđi čar, ala ƀuôn lehanăn dhar kreh. Bi êdah klei čang hmăng djuê ana. Mđĭ ai tiê čŏng pô, đăo knang hlăm ktuê êlan mâo Đảng, mnuih ƀuôn sang ruah leh”.