Adŭ bruă Đảng gưl dlông mrâo ba mdah Klei hưn klei bi klă mơ̆ng Khua gĭt gai Đảng Tô Lâm hlăm mmông mă bruă hŏng Phŭn bruă kiă kriê bruă knuă kơ anôk bruă knŭk kna ngă bruă klam mtrŭt mđĭ bruă lŏ hma ti alŭ wăl êjai ngă gru hmô bruă sang čư̆ êa alŭ wăl dua gưl. Hluê anăn, Khua gĭt gai Đảng Tô Lâm mñă brei hyuă kjăp leh anăn thâo săng kluôm kơ bruă klam, klei yuôm bhăn mơ̆ng bruă lŏ hma leh anăn bruă klam mđĭ kyar bruă lŏ hma hlăm mđĭ kyar bruă duh mkra, ala ƀuôn, mkŏ mkra krĭng ƀuôn sang mrâo, mđĭ hnơ̆ng klei hdĭp mnuih ƀuôn sang djŏ hŏng ai tiê bruă lŏ hma jing klei găl mơ̆ng lăn čar, jing kmeh gơ̆ng bruă duh mkra. Bi klă bruă mtrŭt mđĭ bruă lŏ hma jing bruă klam yuôm bhăn mơ̆ng bruă sang čư̆ êa alŭ wăl gưl ƀuôn hgŭm. Bi kơ gru hmô mkŏ mjing, ti gưl čar, ƀuôn prŏng rơ̆ng kơ dŭm Anôk bruă mtrŭt mđĭ bruă lŏ hma, ngă bruă klam mtô lač, gĭt gai, ksiêm dlăng leh anăn đru kơ gưl ƀuôn hgŭm. Amâo mkŏ mjing dŭm anôk mtrŭt mđĭ bruă lŏ hma alŭ wăl, mlir ƀuôn hgŭm. Dŭm ƀuôn hgŭm mkŏ mjing dŭm anôk bruă knŭk kna phŭn mlir dhar bruă, mta bruă.

Hlue si tur knơ̆ng knuă druh mtrŭt mđĭ bruă lŏ hma ară anei, srăng mbha kơ dŭm ƀuôn hgŭm mâo ƀiă êdi 5 – 6 čô knuă druh, amâo mâo mđĭ ênoh knuă druh bruă lŏ hma.

Lŏ dơ̆ng bi kjăp, mđĭ hĭn boh tŭ dưn klei ngă bruă mơ̆ng dŭm êpul bruă mtrŭt mđĭ bruă lŏ hma ala ƀuôn, mđĭ hĭm bruă hâo hưn, hlăk mblang klei hriăm mkra mjing, đru mtô kơ ƀĭng ngă lŏ hma mkŏ klei đĭ kyar bruă lŏ hma. Dŭm alŭ wăl hluê ngă bruă mkŏ dăp anôk bruă gưl ƀuôn hgŭm êlâo kơ hruê 30/10/2025.