Mơ̆ng klei bi kƀĭn prŏng 13 truh kơ ară anei, êjai dôk găn klei dleh dlan mbĭt hlăm tar rŏng lăn, dôk găn klei lông dlăng prŏng, klei duh mkra Việt Nam ăt mâo klei đĭ kyar jăk, lehanăn dưi krơ̆ng nanao klei hơĭt mơ̆ng gưl găn klei ruă tưp Covid-19. Thŭn 2023, klei bi mnia mblei hŏng ala tač êngao giăm 700 êklai dolar, iêo jak klei duh bi liê mơ̆ng ala tač êngao truh 23 êklai đô la, jing ênoh kdlưn hĭn mơ̆ng êlâo dih truh kơ ară anei, lehanăn jing leh sa gru mngač kơ klei hơĭt, klei lŏ kơrŭ wĭt, lehanăn klei đĭ kyar bruă duh mkra êjai hlăm ala čar lehanăn ala tač êngao dôk găn lu klei dleh dlan. Thŭn 2024, hnơ̆ng GDP mâo êbeh 476,3 êklai USD (đĭ giăm 60 blư̆ mkă hŏng thŭn tal êlâo mlih mrâo), jing leh klei duh mkra prŏng tal 4 ASEAN lehanăn tal 32 mơ̆ng tar rŏng lăn.  Blŭ hrăm ti anôk bi kƀĭn prŏng phung duh mkra mda asei Việt Nam tal 8 mrâo anei, Khua knŭk kna Phạm Minh Chính lač klă:

“Leh giăm 40 mlih mrâo bruă duh mkra Việt Nam mâo leh klei đĭ kyar kjăp. Tơdah thŭn 2025 đĭ kyar êbeh 8%, hnơ̆ng mâo mơ̆ng klei duh mkra 510 êklai USD, dôk tal 32 hlăm tar rŏng lăn. Kah knar grăp čô mnuih jing êbeh 5.000 USD. Snăn, ala čar drei hlăk čhuang hlăm ênoh mâo hrui wĭt kah knar prŏng jing hlăm brô (4.700 ƀiădah Việt Nam êbeh leh 5.000). Anei jing boh tŭ dưn kluôm mơ̆ng  Đảng lehanăn knŭk kna”.

Dưi ƀuh, hlăm 40 thŭn hlue ngă klei mlih mrâo, mâo mjing leh klei kruak knhăl hƀuê ênuk, atăt lăn čar găn mơ̆ng klei dleh dlan, êmưt đĭ kyar čiăng kpưn đĭ hŏng ai mrâo. Bruă duh mkra mnia mblei hlue hdră êlan ngă phŭn êngiê knư̆ hrue knư̆ mâo bi kjăp, mđĭ hnơ̆ng prŏng lehanăn ai dưi bi ktưn mâo êdah klă mngač leh klei đĭ kyar krơ̆ng ti hnơ̆ng prŏng nanao, mđĭ klei hdĭp mnuih ƀuôn sang. bruă kđĭ čar mâo bi kjăp, klei Đảng kiă kriê dưi mlih mrâo nanao, boh tŭ dưn knŭk kna kiă kriê dưi bi kjăp. bruă hŏng ala tač êngao mâo leh lu boh tŭ dưn jăk, mđĭ kơhưm mơ̆ng Việt Nam hŏng ala tač êngao.

Dŭm boh tŭ dưn mâo anăn, jing leh klei yuôm bhăn kơ hƀuê ênuk mjing knơ̆ng kjăp kơ lăn čar kpưn đĭ, lehanăn klei mnuih ƀuôn sang đăo knang kơ klei  Đảng kiă kriê, mjing mnơ̆ng kơ klei čih mkra dŭm hră mơar kơ klei bi kƀĭn prŏng Đảng 14, hlue hŏng hdră êlan mlih mrâo, êpa mhao hŏng hdră êlan êlan đĭ kyar mrâo. Tui si Khua gĭt gai Đảng Tô Lâm, Klei bi kƀĭn prŏng Đảng kluôm ala gưl 14 jing yuôm bhăn, hŏng klei kruak knăl kơ klei lăn čar đĭ kyar, pŏk leh “ênuk kpưn đĭ nao hlăm klei mdrŏng sah prŏng”.

Čiăng dưi bi sĭt jih jang hdră êlan mơ̆ng Đảng, djăp mta hră mơar kơ klei bi kƀĭn prŏng 14 mâo ksiêm mkă leh ƀhĭ klĭ, tă êlan bi kjăp, mklin jih jang ai tiê klei mĭn mơ̆ng Đảng lehanăn mnuih ƀuôn sang, bi êdah klei bi sa ai djŏ hŏng klei mĭn   Đảng lehanăn ai tiê mnuih ƀuôn sang, bi klin djăp ênŭm jih jang klei jăk găl pioh kơ lăn čar čhuang hlăm knhuang mđĭ kyar mrâo.  K’iăng nai prŏng, nai prĭn Nguyễn Trọng Phúc, ti sang hră ksiêm hriăm kơ bruă kđi čar ala čar Hồ Chí Minh lač:

“Klei bi kƀĭn prŏng 14, jing leh knhuang đĭ kyar prŏng mơ̆ng Đảng, jing leh gru kruak knăl kơ klei đĭ kyar hlăm Đảng, Knŭk kna… dŭm êpul dôk mă bruă, hlue ngă hdră mtrŭn mơ̆ng klei bi kƀĭn prŏng, hlue ngă hdră êlan prŏng, dŭm klei gĭt gai kjăp mơ̆ng klei bi kƀĭn prŏng, mta kñăm mơ̆ng ênuk gưl mrâo… Klei kiă kriê bi êdah klei bhiăn kjăp mrâo anăn jing klei yuôm bhăn hĭn. Jih jang klei đĭ kyar kơ lăn čar leh klei bi kƀĭn prŏng 14, jing tui hlue hlăm klei kiă kriê, klei gĭt gai mơ̆ng gưl dlông, mơ̆ng phŭn bruă kđi čar, jih jang bruă kđi čar hlăm klei mlih mrâo.”

Hŏng akŏ "Ti gŭ hla čhiăm gru kdrưh k’ăm mơ̆ng Đảng, sa ai tiê, klei mĭn hlue ngă tŭ jing dŭm mta kñăm klei mđĭ kyar lăn čar truh kơ thŭn 2030; čŏng mjing hdră êlan jăk, čŏng pô kpưn đĭ hlăm ênuk gưl mrâo mơ̆ng djuê ana, kyua klei êđăp ênang, hnŭk êngiê, mdrŏng sah kreh dhar jăk, kjăp knhuang đuĕ nao kơ yang ƀuôn ngă phŭn êngiê”, Klei bi kƀĭn prŏng Đảng kluôm ala gưl 14, jing klei lŏ čuê, lehanăn mđĭ hĭn klei tŭ dưn leh mâo hlăm 40 thŭn mlih mrâo, jing leh klei kruak knăl yuôm bhăn kơ hdră êlan mơ̆ng sa ala čar dôk đĭ kyar ktang kjăp./.