Ti Hà Nội, lu mnuih ƀuôn sang ti ƀuôn prŏng phŭn leh anăn phung tuê wĭt ti wăl krah ƀuôn prŏng, jŭm dar sang kƀĭn Prŏng, ênao Hoàn Kiếm…drông Noel. Adiê hlăm mlam Noel không, amâo mâo êăt đei, mâo klei găl kơ dŭm klei hlăp lêñ, nao čuă dlăng mơ̆ng mnuih ƀuôn sang. Amâo djŏ knŏng jŭm dar ênao Hoàn Kiếm, alŭ wăl ti anăp sang Aê Diê prŏng lŏ iêo jak phung tuê mâo ƀô̆ mta mơ̆ng hnưm čiăng čuă dlăng, mă rup. Hlăm lam sang kƀĭn, dưi msiam krưh kơăm hŏng pui mngač leh anăn wăl anôk mlam Noel, mơĭt klei hưn kơ sa mlam Noel êđăp ênang, iêo jak lu mnuih ƀuôn sang leh anăng phung tuê nao čuă dlăng.

Ai êwa Noel ti Dak Lak mâo hlăm djăp anôk, jăk siam hlăm yan adiê êăt ti lăn Dap Kngư. Dŭm ktuê êlan nao ti krĭng đăo, sang kkuh mpŭ dưi bi msiam. Êngao kơ sang bi kƀĭn prŏng phung khop, sang čhĭ kphê, anôk čhĭ mnơ̆ng bi msiam lu êa mil… mjing anôk mă rup jăk siam. Sa ya hơuh mđao, jăk mơak, mnuih ƀuôn sang hlue đăo mđing kơ êdei anăp ƀuôn sang ƀrư̆ đĭ kyar. Mnuih ƀuôn sang nao hlăm ai êwa Noel ti Sang bi kƀĭn prŏng phung Khop Buôn ma Thuôt hơuh mđao leh anăn mâo ai tiê bi đru.

Mlam hruê 24/12, Đà Lạt msĕ si lŏ hơô ai mrâo lu êa mil. Ti krah dhul kpal, pui mngač mơ̆ng dŭm sang Aê Diê leh anăn dŭm klei mmuñ mơak Noel ti grăp bĭt êlan, hưn kơ sa yan Noel êđăp ênang ti krĭng êbâo mnga. Mta knăm siam hĭn jing alŭ wăl Sang kƀĭn phŭn Đà Lạt. Ti krah wăl anôk đưm, ana hngô Noel prŏng mbĭt hŏng dŭm êbâo angpul lep mngač, iêo jka dŭm êbâo gưl čô mnuih ƀuôn sang leh anăn phung tuê. mbĭt anăn 21 sang Aê Diê Khop ti ƀuôn prŏng Xuân Hương - Đà Lạt ăt mngač hlăm mlam Mơak, jing anôk truh dhar kreh amâodưi kƀah ôh, wăt hŏng mnuih ƀuôn sang, phung tuê, phung đăo amâodah hơăi. Dŭm ƀuôn êlan, mnuih K’Ho hơ̆k mơak drông Noel, wah lač kơ thŭn mrâo êđăp ênang, trei mđao.