Tlam 17/9 mbruê, ti Hà Nội, Sang hră ksiêm hriăm bruă kđi čar ala čar Hồ Chí Minh mkŏ mjing leh Knăm bi hdơr Hruê knhuah gru mơ̆ng Sang hră (9/1949 – 9/2024) lehanăn tŭ mă Medai ngă bruă mrô sa;  mkŏ online hŏng dŭm anôk bruă mơ̆ng Sang hră anei. Bi ala phung khua kiă kriê Đảng, Knŭk kna; Khua gĭt gai Tô Lâm nao lehanăn blŭ hrăm. Ti knăm anei, Khua gĭt gai Tô Lâm jao leh Medai ngă bruă mrô sa; klei pah mni yuôm bhăn mơ̆ng Đảng, Knŭk kna brei kơ Sang hră ksiêm hriăm bruă kđi čar ala čar Hồ Chí Minh.

Blŭ ti knăm anei, Khua gĭt gai Tô Lâm mtă, brei mkŏ mkra Sang hră anei klă sĭt jing gru bi hmô mngač kơ bruă mkŏ mkra Đảng; gru mngač kơ bruă kriê kjăp klei bhiăn hriăm hră, jing gru mngač mjut mjing knhuah hdĭp, knhuah mă bruă jăk siam mơ̆ng mnuih Cộng sản; jing anôk mjuăt bi hriăm bruă Đảng, dhar kreh Đảng lehanăn klei thâo kjăp hlăm bruă kđi čar kơ phung knuă druh, đảng viên hriê hriăm mjuăt ti Sang hră, lŏ dơ̆ng đru, hrăm mbĭt hŏng Sang hră bruă kđi čar čiăng dưi mâo dŭm hnơ̆ng čuăn kdlưn hĭn, bi leh gru hmô Sang hră ksiêm hriăm kreh knhâo, kriê kjăp lehanăn bi lar dŭm boh tŭ jăk siam mơ̆ng dhar kreh Sang hră ksiêm hriăm bruă Đảng truh kơ dŭm Sang hră bruă kđi čar lehanăn anôk bruă mtô bi hriăm mkăn hlăm kluôm ala./.