Hlăm ai êwa kdrưh kơăm, phung bi ala leh anăn mnuih ƀuôn sang myơr brui mgưi, mâo mnĭt bi hdơr kơ mnguh mngăt phung jhŏng ktang djiê êngiă kyua klei êngiê mơ̆ng Lăn čar. Anei ăt jing wưng mtô kơ knhuah gru khăp kơ lăn čar kơ ênuk ară anei, bi mbŏ klei đăo knang leh anăn bruă klam hŏng bruă mkŏ mjing, răng mgang Lăn čar.

Nao hlăm knăm bi hdơr, Lê Chí Quyết, k’iăng khua hđăo dhar bruă kiă kriê lĭng kahan čar Dak Lak, k’iăng khua bruă Đảng čar hđăp čar Dak Lak mgei ai tiê brei thâo, bruă mkŏ mjing knăm bi hdơr djŏ wưng Klei kƀĭn prŏng 14 mơ̆ng Đảng lŏ bi êdah hĭn boh tŭ dưn knhuah gru cách mạng, bi kjăp klei đăo knang mơ̆ng knuă druh, đảng viên leh anăn mnuih ƀuôn sang hlăm klei gĭt gai mơ̆ng Đảng.