Knơ̆ng bruă sang čư̆ êa čar Gia Lai mrâo bi mklă leh sa klei bi tŭ ư ruah knơ̆ng bruă rŭ mdơ̆ng Ion Complex (ɃP. Hà Nội) jing pô rŭ mkra tač golf Đak Đoa, hŏng ênoh bi liê jih jang êbeh 1.150 êklai prăk. Tač golf Đak Đoa mâo rŭ mkra hlăm alŭ wăl rŭ mjing Đak Đoa, srăng mă bruă mơ̆ng 3 mlan akŏ thŭn 2026 hlŏng truh kơ 3 mlan knhal jih thŭn 2029, wưng kčah anôk anei dưi dưn yua hlăm 50 thŭn.

Knơ̆ng bruă sang čư̆ êa čar Gia Lai jao kơ knơ̆ng bruă lŏ hma lehanăn wăl hdĭp mda kiă kriê ksiêm dlăng klei jao lăn, brei mưn lăn bi djŏ hŏng hdră bhiăn knŭk kna, lehanăn bi hgŭm hŏng knơ̆ng bruă ngăn prăk bi klă klei tŭ dưn ngă dŏ djŏ tuôm hŏng lăn ala, hlăm anăn mâo dliê hngô, lehanăn dŭm klei bi liê djŏ tuôm mkăn mâo pô duh bi liê ba jao leh djŏ tui si klei hrŏng ruah. Dŭm knơ̆ng dhar bruă lehanăn knơ̆ng bruă sang čư̆ êa ƀuôn hgŭm Đak Đoa mâo leh bruă klam bi hgŭm, ksiêm dlăng, ktrâo atăt pô duh mkra hlue ngă djăp hdră êlan mă bruă kơ klei duh bi liê, klei kơ lăn ala, bruă rŭ mkra, bruă čuăl mkă, bruă răng mgang wăl hdĭp mda, bruă mdrơ̆ng hŏng klei pui ƀơ̆ng, bruă răng mgang kjăp klei êđăp ênang./.