Jing krĭng kreh hmăi mơ̆ng klei yan adiê êa lip lêč ngă, nah Ngŏ čar Gia Lai, jing čar Bình Định hđăp mrâo găn gưl angĭn êbŭ mrô 13 lehanăn gưl adiê hjan angĭn êbŭ prŏng knhal jih thŭn 2025, ngă luič liê kjham kơ klei hdĭp lehanăn bruă duh mkra pla mjing mơ̆ng mnuih ƀuôn sang. Dŭm êtuh boh sang dlưh, dŭm êbâo boh sang êngăp êa, dŭm êbâo m guê gang êa klưh hroh, êngăp êa ti lu ênhă pla mjing. Êlâo kơ Klei bi kƀĭn tal XIV mơ̆ng Đảng, Huỳnh Khánh Ly, alŭ Luật Lễ, să Tuy Phước Đông, čar Gia Lai brei thâo:

“Klei bi kƀĭn tal anei mnuih ngă lŏ hma ti krĭng wăl čang hmăng Knŭk kna lŏ dơ̆ng mđing kơ krĭng êa lip, yan adiê ngă . Djiêu gah găn jing hnoh krông. Mnuih ƀuôn sang ăt čiăng mâo guê gang êa kjăp hĭn, êlan klông, kban kjăp, čiăng kơ klei găn êrô găl ênưih, mnuih ƀuôn sang mđing kơ hdră mđĭ kyar”.

Ăt mâo msĕ klei čiăng anăn, Nguyễn Thanh Dũng, Khua êpul hgŭm bruă Lŏ hma Phước Thuận, Gia Lai lač, klei kơ anôk bruă nah gŭ jing bruă phŭn hŏng krĭng kreh mâo klei êa lip lêč ngă.

“Krĭng kreh mâo klei êa lip lêč klei mđoh đuê̆ êa ăt mâo lu klei êdu kƀah. Kơ anôk bruă nah gŭ ăt čang hmăng Knŭk kna mđing dlăng; tal sa jing duh kơ anôk bruă nah gŭ kơ bruă êlan klông, tal dua jing knơ̆ng mbông êa, klei mđuê̆ êa”.

Mđing truh Klei bi kƀĭn tal XIV mơ̆ng Đảng, Tô Thị Thu Hường, Kơiăng khua bruă Đảng ƀuôn hgŭm Quy Nhơn, bi êdah klei đăo knang hdră bi mlih mtah mâo Đảng drei dôk gĭt gai, srăng mkăp djŏ hŏng klei čang hmăng mơ̆ng mnuih ƀuôn sang, kơ sa tur knơ̆ng đĭ kyar kjăp anăp klei yan adiê ngă – bi mlih yan adiê. Mbĭt hŏng anăn, dŭm hdră mtrŭn mđrăm mbĭt mơ̆ng Klei bi kƀĭn, srăng ba ala čar đĭ kyar pral hlăm wưng mrâo. Kơ bruă Đảng ƀuôn hgŭm, srăng gĭr bi lông ktưn kkuh mơak Klei bi kƀĭn.

“Leh dŭm klei hmăi mơ̆ng angĭn êbŭ ngă, Quy Nhơn ƀrư̆ krŭ wĭt mđing truh kơ Klei bi kƀĭn Đảng tal XIV. Hlăm ai êwa bŏ hŏng hla čhiăm gru lehanăn mnga mbĭt hŏng êa mil jăk siam mŏng lăn adiê mjing leh pŏk rup jăk êdi čiăng mprăp hluê ngă jăk dŭm bruă klam mâo jao. Mnuih ƀuôn sang ƀuôn hgŭm Quy Nhơn dôk mđing truh kơ Klei bi kƀĭn hŏng klei đăo knang lehanăn klei čang hmăng hlăm dŭm hdră êlan phŭn mơ̆ng Đảng”.

Dưi ƀuh, mơ̆ng boh sĭt adôk dleh dlan ti krĭng kreh mâo klei êa lip ti nah Ngŏ Gia Lai, dŭm klei akâo čiăng mơ̆ng mnuih ƀuôn sang lehanăn gưl nah gŭ mđing kơ anôk bruă nah gŭ hơĭt kjăp hĭn, mdrơ̆ng hŏng guôp hŏng klei bi mlih yan adiê. Mđing truh kơ Klei bi kƀĭn phung bi ala kluôm ala čar tal XIV mơ̆ng Đảng, klei đăo knang, klei čang hmăng mơ̆ng mnuih ƀuôn sang dưi ba mơĭt hlăm dŭm hdră mtrŭn phŭn, hlăm wưng sui, anak mnuih jing phŭn, klei êđăp ênang, duh ƀơ̆ng lehanăn đĭ kyar hơĭt kjăp jing mta kñăm hlăm wưng sui./.