Mơ̆ng asăr mjeh pla ti Đà Lạt êbeh 30 thŭn êlâo, truh kơ ară anei Dalat Hasfarm mâo leh 4 đang war hŏng êbeh 220ha sang ală kĭng kdrăp mrâo mrang, ba čhĭ nga kơ 18 ala čar Ơrôp leh anăn Mi. Ti Việt Nam, knơ̆ng bruă anei mâo 25 sang čhĭ mnia mnga leh anăn êbeh 300 anôk čhĭ hlăm sang mnia prŏng, mkŏ mjing bruă mă kơ dŭm êbâo čô mă bruă ti alŭ wăl. Aad Gordijn Ell Cordin, khua knơ̆ng bruă Dalat Hasfarm mñă klă: Hmei hriê djŏ anôk, djŏ wưng. Đà Lạt mâo yan adiê jăk hĭn ti Ngŏ Dhŭng Asi čiăng pla mnga, pla djam. Ñu brei thâo: Kâo hơ̆k mơak êdi dưi hriê kah mbha klei găl, klei yăl dliê mơ̆ng asăr mjeh điêt dưi pla mơ̆ng 31 thŭn êlâo leh anăn ară anei jing leh ana kyâo prŏng leh anăn bi kpum”.

Leh bi mŭt mbĭt 3 čar Lâm Đồng, Dak Nông leh anăn Bình Thuận, čar Lâm Đồng mrâo mâo êbeh 1 êklăk ha lăn lŏ hma hŏng lu ana pla mjing ba wĭt boh tŭ dưn , jing sa hlăm 5 čar ba anăp hŏng lu ana pla mjing ba wĭt boh tŭ dưn msĕ si kphê, mnga, djam, durian leh anăn gu ga. Lê Huy Anh, k’iăng khua anôk bruă kiă kriê mnơ̆ng dhơ̆ng, Phŭn bruă kreh knhâo leh anăn mrâo mrang, knŏng kơ kphê, Lâm Đồng mâo leh dŭm bruă tŭ dưn kơ klei lu jơr, thơ̆ng kơ bruă:

 “Kphê mơ̆ng čar Lâm Đồng hluê si klei bi klă mơ̆ng hmei jing sa mnơ̆ng dhơ̆ng mdê hĭn. Mđĭ kyar kphê Arabica leh anăn Robusta. Amâo mâo lu ôh alŭ wăl mơ̆ng Việt Nam dưi pla jih dua mta kphê anei. Anôk bruă kiă kriê mnơ̆ng dhơ̆ng hmei bi klă năng čiăng lŏ ktrâo anôk kơ mnơ̆ng dhơ̆ng anei”.

 Lâm Đồng ară anei jing sa hlăm dŭm anôk bruă lŏ hma mrâo mrang mrô 1 mơ̆ng lăn čar. Čar ară anei mâo ênhă lŏ hma dưn yua kdrăp mrâo mrang truh êbeh 107.000ha, ênoh mnơ̆ng dhơ̆ng kah knar mâo hlăm brô 195 êklăk prăk sa ha. Boh nik djam leh anăn mnga Đà Lạt mơ̆ng êlao jing leh gru hmô, mâo hlăm dŭm anôk mnia mblei dleh msĕ si Japon, Dhŭng Korea, Ơrôp leh anăn Dưr Amarik. Nguyễn Ngọc Phúc, k’iăng khua Bruă sang čư̆ êa čar Lâm Đồng brei thâo, klei găl ba yua klei kreh knhâo mrâo mrang hlăm bruă lŏ hma dôk dưi mđĭ kơhưm kơ boh mnga alŭ wăl:

 “Lâm Đồng mâo bruă lŏ hma đĭ kyar ktang. Lâm Đồng mâo klei găl jing phung thơ̆ng kơ bruă mrô 1 mâo lu ti dŭm anôk ksiêm duah, dŭm sang hră gưl prŏng, Ai dưi anei lŏ dơ̆ng đru kơ klei mlih mrâo leh anăn mbruă. Mtrŭt mđĭ klei ba yua kdrăp mrô hlăm bruă lŏ hma. Anei ing bruă hmei dôk mâo klei găl. Anei ăt jing wưng čiăng kơ Lâm Đồng drei đĭ kyar ktang leh anăn ba yua klei găl kơ yan adiê kơ bruă lŏ hma leh anăn wăl đĭ kyar mbruă”.

Kyua čŏng ba yua klei kreh knhâo mrâo mrang, hnơ̆ng jăk, boh mnga leh anăn ênoh boh mnga mơ̆ng čar Lâm Đồng ƀrư̆ hruê ƀrư̆ đĭ. Mŭt hlăm wưng đĭ kyar mrâo, Lâm Đồng uêñ mĭn kơ bruă mkŏ mjing anăn knăl, pŏk mlar anôk mnia mblei, bi mguôp čiăng djŏ guôp hŏng klei bi mlih yan adiê, mđĭ kyar bruă hiu čhưn ênguê bruă lŏ hma wăl mnơ̆ng hdĭp. Hluê si Hồ Văn Mười, k’iăng khua bruă Đảng čar, khua Bruă sang čư̆ êa čar Lâm Đồng, dŭm krĭng bruă lŏ hma prŏng mơ̆ng čar srăng dưi bi lar hlăm dŭm klei găl mrâo kơ klei kreh knhâo mrâo mrang leh anăn êlan klông:

 “Hmei kñăm kơ êlan klông êlâo kơ thŭn 2025 jing êlan dơ̆ng pral srăng mkŏ mơ̆ng nei truh ƀuôn prŏng khua gĭt gai Hồ Chí Minh. Alŭ wăl Gia Nghĩa ăt truh ti Đồng Nai leh anăn ƀuôn prŏng khua gĭt gai Hồ Chí Minh. Leh anăn hmei srăng gĭt mkra êlan Ngŏ – Yŭ mơ̆ng Gia Nghĩa truh kơ Bảo Lộc truh Phan Thiết hlăm brô 120km. Boh nik tač êdeh phiơr Liên Khuơng anăp anei ăt dưi mđĭ hnơ̆ng drông êdeh phiơr prŏng hŏng ară anei. Tač êdeh phiơr Phan Thiết dưi ba yua leh, leh anăn hmei hưn mdah hŏng gưl dlông čiăng ba yua tač êdeh phiơr anei hlăm thŭn 2026 anei”.

Bi klă mđĭ kơhưm kơ boh mga amâo djŏ knŏng jing mta kñăm bruă duh mkra, ƀiădah lŏ mđĭ hnơ̆ng klei hdĭp kơ mnuih ƀuôn sang leh anăn mđĭ kyar bruă lŏ hmâ hơĭt kjăp mơ̆ng čar Lâm Đồng. Hŏng klei găl dưi mkŏ mjing mbĭt hŏng klei gĭr mlih mrâo leh anăn klei ñŭ kma hlăm ênuk kpưn đĭ mơ̆ng lăn čar, boh mnga Lâm Đồng dôk ƀrư̆ ƀrư̆ kpưn đĭ, kruăk knăl hlăm anôk mnia mblei tar rŏng lăn.